سڪيورٽي فورسز جي وڏي ڪاميابي، پابندي مڙهيل تنظيم بلوچ نيشنل آرمي جي باني ۽ انتهائي گهربل دهشتگرد گلزار امام کي گرفتار ڪري ورتو آهي.
آءِ ايس پي آر موجب، سڪيورٽي فورسز ڳجهي اطلاع تي ڪارروائي ڪندي هاءِ ويليو ٽارگٽ گلزار امام عرف شمبي کي گرفتار ڪري ورتو.
آءِ ايس پي آر جو چوڻ آهي ته گلزار امام پابندي مڙهيل تنظيم بلوچ نيشنل آرمي جو باني ۽ اڳواڻ آهي.
آءِ ايس پي آر موجب، بي اين اي، بلوچ ريپبلڪن آرمي ۽ يونائيٽيڊ بلوچ آرمي جي ضم ٿيڻ سان وجود ۾ آيو هو، بلوچ نيشنل آرمي پنجگور ۽ نوشڪي ۾ قانون لاڳو ڪندڙ ادارن تي حملن ۾ ملوث آهي.
آءِ ايس پي آر جو چوڻ آهي ته بلوچ نيشنل آرمي پاڪستان ۾ ڪيترن ئي دهشتگرد حملن جي ذميوار آهي، گلزار امام 2018ع تائين بلوچ ريپبلڪن آرمي ۾ برهمداغ بگٽي جو نائب به هو.
آءِ ايس پي آر موجب، گلزار امام جا افغانستان ۽ ڀارت جا دورا به رڪارڊ تي آهن.
آءِ ايس پي آر جو چوڻ آهي ته گلزار امام کي مڪمل پلاننگ سان ڪامياب آپريشن کانپوءِ گرفتار ڪيو ويو، سندس گرفتاري بي اين اي ۽ ٻين ويڙهاڪ ٽولن لاءِ وڏو ڌچڪو آهي، سندس دشمن جي ڳجهن ادارن سان لاڳاپن بابت جاچ ڪئي پئي وڃي.
