شام ۾ اسرائيلي هوائي حملي ۾ ايراني پاسداران انقلاب جو هڪ وڌيڪ ميمبر مارجي ويو آهي.
عرب ميڊيا موجب ايراني ميڊيا جو چوڻ آهي ته اسرائيل دمشق ويجهو هوائي حملو ڪيو، جنهن جي نتيجي ۾ پاسداران انقلاب جو هڪ وڌيڪ ميمبر مارجي ويو.
پاسداران انقلاب موجب مقدد ميغاني جعفرآبادي جمعي ڏينهن ٿيل اسرائيلي حملي ۾ سخت زخمي ٿي پيو هو، جيڪو زخمن جا سور نه سهندي فوت ٿي ويو.
هو شام ۾ فوجي صلاحڪار طور ذميواريون سرانجام ڏئي چڪو آهي.
ايران جو چوڻ آهي ته اسرائيل پنهنجي هن ڏوهه تي جوابداه هوندو ۽ کيس ان جي ڳري قيمت چڪائڻي پوندي.
شام ۾ ڪم ڪندڙ انساني حقن جي تنظيم جو چوڻ آهي ته جمعي جي شام جو ٿيل حملو مارچ مهيني ۾ ٿيل ڇهون حملو هو.
ايران موجب سندن آفيسر دمشق جي دعوت تي شام ۾ ايڊوائيزري ڪردار ادا ڪندا آهن.
شام ۾ جنگ دوران هن مهل تائين پاسداران انقلاب جا ڪيترائي سينيئر ميمبر مارجي چڪا آهن.
