افغانستان ۾ عورتن جي ريڊيو اسٽيشن “صدائي بانوان” يعني عورتن جو آواز جي نشريات هڪ هفتو بند رهڻ کانپوءِ بحال ڪئي وئي آهي.
هڪ هفتو اڳ طالبان رمضان جي ڀلاري مهيني دوران موسيقي نشر ڪرڻ جي ڏوهه ۾ صدائي بانوان جي نشريات بند ڪري ڇڏي هئي.
دَري زبان ۾ صدائي بانوان جو مقصد عورتن جو آواز آهي، ان نشريات جي شروعات ڏهه سال اڳ درخشان صوبي کان ٿي هئي.
هي واحد ريڊيو اسٽيشن آهي جنهن ۾ اڪثر عملو عورتن تي ٻڌل آهي، ريڊيو جي اَٺن ملازمن ۾ ڇهه عورتون آهن.
ڊائريڪٽر انفرميشن اينڊ ڪلچر معيز الدين احمدي موجب ريڊيو انتظاميا طرفان ملڪي قانون تي عمل ڪرڻ جي خاطري ڪرائڻ کانپوءِ نشريات بحال ڪرڻ جي اجازت ڏني وئي.
ريڊيو اسٽيشن جا انتظام هلائيندڙ ناجيه سروش موجب اطلاعات ۽ ثقافت کاتي کي موسيقي نشر نه ڪرڻ جو يقين ڏياريو ويو، جنهن کانپوءِ نشريات بحال ڪرڻ جي اجازت ڏني وئي.
