پنجاب ۽ خيبر پختونخوا ۾ چونڊون ملتوي ڪرڻ بابت ڪيس ۾ چيف جسٽس عمر عطا بنديال طرفان جوڙيل چار رڪني بينچ ٽٽي وئي.
چيف جسٽس عمر عطا بنديال جي سربراهيءَ ۾ چار رڪني بينچ ٻڌڻي لاءِ عدالتي ڪمري ۾ پهتي ته اٽارني جنرل منصور عثمان اعواڻ روسٽرم تي اچي ويو.
چيف جسٽس عمر عطا بنديال چيو ته اٽارني جنرل کي چيو ته ان کان اڳ اوهان ڪجهه چئو، جسٽس جمال خان مندوخيل ڪجهه چوڻ چاهي ٿو.
جسٽس جمال مندو خيل ڪيس جي ٻڌڻي ڪرڻ کان معذرت ڪري ڇڏي.
جسٽس جمال مندوخيل چيو ته جسٽس امين الدين ڪيس ٻڌڻ کان معذرت ڪئي، جسٽس امين جي فيصلي بعد حڪمنامي جو انتظار هو، کيس عدالتي حڪمنامو گهر مليو، حڪمنامي تي ڌار نوٽ لکيو آهي، اٽارني جنرل صاحب اوهان اختلافي نوٽ پڙهي ٻڌايو.
اٽارني جنرل گذريل ڏينهن ٻڌڻيءَ جي حڪمنامي ۾ جسٽس جمال مندوخيل جو اختلافي نوٽ پڙهي ٻڌايو، جنهن ۾ چيو ويو آهي ته هو بينچ جو ميمبر هو، فيصلو لکڻ وقت ساڻ صلاح مشورو نه ڪيو ويو، هو سمجهي ٿو ته بينچ ۾ مس فٽ آهي، دعا آهي ته بينچ جيڪا به هجي ڪيس ۾ اهڙو فيصلو اچي جيڪو سڀني لاءِ قابل قبول هجي، الله تعاليٰ اداري تي رحم ڪري، هو ۽ سندس سمورا ساٿي جج آئين جا پابند آهن، حڪمنامو لکيل عدالت ۾ ناهي لکيو ويو، جسٽس فائز عيسيٰ جي فيصلي جو کليل عدالت ۾ جائزو ورتو وڃي.
چيف جسٽس عمر عطا بنديال، جسٽس جمال مندوخيل کي ڳالهائڻ کان روڪيندي چيو ته اوهان جي وڏي مهرباني، بينچ ٺاهڻ بابت جيڪو به فيصلو ٿيندو اهو عدالت ۾ ٻڌايو ويندو.
جسٽس جمال خان مندوخيل چيو ته خميس ڏينهن به ڪجهه چوڻ پئي چاهيو، شايد فيصلو لکڻ وقت سندس مشوري جي ضرورت نه هئي، ٿي سگهي ٿو فيصلو لکڻ وقت کيس مشوري جي لائق نه سمجهيو ويو، الله پاڪ ملڪ تي رحم ڪري.
