عام چونڊن جي تاريخ بابت حڪومت ۽ تحريڪ انصاف ۾ ڳالهين جو ٻيو دور مڪمل ٿي ويو، اڱاري تي ٽيون رائونڊ ٿيندو، حڪومت طرفان سيپٽمبر مهيني ۾ هڪ ئي وقت عام چونڊون ڪرائڻ جي آڇ ڪئي آهي، تحريڪ انصاف وفد تجويز تي عمران خان سان ڳالهائڻ تي راضپو ظاهر ڪري ڇڏيو.
حڪومتي وفد ۽ پي ٽي آءِ وچ ۾ ڳالهيون پارليامينٽ هائوس جي ڪميٽي روم نمبر ٽي ۾ ٿيون، حڪومتي ۽ تحريڪ انصاف جي ٽيمن سينيٽ چيئرمين صادق سنجراڻيءَ سان به ملاقات ڪئي.
ذريعن موجب ملاقات دوران حڪومت اليڪشن جي تاريخ تي لچڪ جي جواب ۾ لچڪ جو مظاهرو ڪري رهي آهي.
حڪومت طرفان سيپٽمبر مهيني ۾ هڪ ئي وقت عام چونڊون ڪرائڻ جي آڇ ڪئي وئي، جنهن تي تحريڪ انصاف وفد تجويز تي عمران خان سان ڳالهائڻ تي راضپو ظاهر ڏيکاريو.
ڳالهين بعد ميڊيا سان ڳالهائيندي اسحاق ڊار چيو ته ٻئي ڪميٽيون اڱاري ڏينهن ٻيهر ملنديون.
هن چيو ته هو پنهنجي پنهنجي قيادت آڏو ڳالهيون رکندا، ڳالهين دوران ٻنهي طرفن کان اڳڀرائي ٿي آهي.
اسحاق ڊار چيو ته ڳالهين ۾ ڪو ڊيڊلاڪ ناهي، ٻنهي طرفن کان تجويزن تي ڳالهيون ڪيون ويون.
تحريڪ انصاف اڳواڻ شاهه محمود قريشي چيو ته سندس نظر ۾ اڄ مناسب اڳڀرائي ٿي، هنن آئين جي دائري ۾ پنهنجو موقف پيش ڪيو، طئه ٿيو ته ايندڙ گڏجاڻي اڱاري ڏينهن ٿيندي، هو ۽ علي ظفر لاهور وڃي عمران خان کي آگاهه ڪندا.
شاهه محمود قريشي چيو ته گرفتارين جو سلسلو ڳالهين کي تباهه ڪري ڇڏيندو، گرفتاريون جاري رهيون ته ڳالهين جو ڪو به فائدو ناهي.
فواد چوڌري چيو ته ڳالهين دوران گرفتاريون ٿي رهيو آهن، اهي نه ٿيڻ گهرجن، حڪومتي وزير چون ٿا گرفتاريون اهي نه پيا ڪن، حڪومتي ٽيم کي گرفتارين بابت آگاهه ڪيو.
