درازا شريف ۾ سنڌ جي وڏي وزير مراد علي شاهه، اوقاف کاتي واري وزير سيد احمد رضا شاهه سان گڏ هفت زبان شاعر حضرت سچل سرمست جي مزار تي چادر چاڙهي عرس جي سرڪاري تقريبن جو افتتاح ڪري ڇڏيو.
ان موقعي تي ميڊيا سان ڳالهائيندي وڏي وزير مراد علي شاهه چيو آهي ته عام چونڊون شفاف طريقي سان هڪ ئي وقت ٿيڻ گهرجن.
هن چيو ته جلد بازي ۾ ڪيل فيصلن ۾ هميشه مونجهارا هوندا آهن، فيصلي مان جج مطمئن ناهن ته عوام ڪيئن ٿيندو؟.
وڏي وزير چيو ته 2018ع جهڙيون چونڊون ڪنهن به صورت ۾ قبول نه هونديون، چونڊون ضرور ٿين، پر ليول پلينگ فيلڊ هئڻ ضروري آهي.
هن چيو ته چونڊن جو فيصلو اليڪشن ڪميشن تي ڇڏڻ گهرجي، چونڊون تڏهن ٿينديون جڏهن اليڪشن ڪميشن چاهيندي.
مراد علي شاهه چيو ته آئين ۾ ادارن جون حدون ۽ اختيار مقرر ٿيل آهن، جنهن کي اورانگهڙ نه گهرجي.
هن چيو ته سنڌ حڪومت ملڪ ۾ اٽي جي بحران باوجود اٽو 65 رپيا في ڪلو ڏئي رهي آهي.
وڏي وزير چيو ته ڪچي ۾ ڏوهارين خلاف آپريشن جاري آهي، ڏوهارين تائين هٿيارن جي پهچ کي روڪڻو پوندو ….
