پاڪستان شوبز انڊسٽري جي ناليواري اداڪار ۽ راڳي علي ظفر ۽ اڳوڻي ڪرڪيٽر شاهد آفريدي چانهه جي هوٽل تي ڪم ڪندڙ باڪسر آغا ڪليم جي هر ممڪن مدد ڪرڻ جو اعلان ڪري ڇڏيو.
پاڪستان جي لاءِ ايشيئن ۽ ورلڊ ٽائٽل کٽي ايندڙ باڪسر آغا ڪليم ٽوئٽر تي وڊيو پوسٽ ڪندي راندين سان لاڳاپيل سنڌ حڪومت ۽ شاهد آفريدي سميت ٻين رانديگرن کي ٽيگ ڪندي مدد جي اپيل ڪئي هئي.
وڊيو ۾ آغا ڪليم کي هڪ چانهه جي هوٽل تي پراٺا ٺاهيندي ڏسي سگهجي ٿو.
ڪراچي ۾ رهندڙ باڪسر جي ان اپيل تي رد عمل ڏيندي علي ظفر ۽ شاهد آفريدي مدد ڪرڻ جو اعلان ڪيو آهي.
شاهد آفريدي ٽوئيٽ ۾ لکيو ته هو مڪمل ذميواري کڻڻ لاءِ تيار آهي، شاهد آفريدي فائونڊيشن ۽ ميگا اسٽار ليگ ٺاهڻ جو مقصد اهو ئي آهي ۽ هن پنهنجي ٻنهي ٽيمن کي الرٽ ڪري ڇڏيو آهي.
علي ظفر باڪسر آغا ڪليم کي مدد ڪرڻ جي خاطري ڪرائيندي لکيو ته کين قومي هيروز جو قدر ڪرڻ گهرجي، خاص طور تي انهن جي جن عالمي سطح تي پاڪستان جو نالو روشن ڪيو انهن کي ڪڏهن به اڪيلو نه ڇڏڻ گهرجي.
علي ظفر مطالبو ڪيو ته اهڙي ٽئلينٽ کي روڪڻ واري اسپورٽس مافياز جو خاتمو ٿيڻ گهرجي، هو پنهنجي ايندڙ فلم ۾ آغا ڪليم کان تربيت به حاصل ڪندو.
