تحريڪ انصاف جي چيئرمين عمران خان حڪومت سان ڳالهين لاءِ فوري طور اليڪشن ڪرائڻ جي شرط رکي ڇڏي، عمران خان چيو آهي ته جيڪڏهن 14 مئي تي چونڊون نه ٿيون ته آئين ٽٽي ويندو.
اسلام آباد هاءِ ڪورٽ ٻاهران صحافين سان ڳالهائيندي اڳوڻي وزيراعظم عمران خان چيو آهي ته جيڪڏهن آئين ٽٽي ويو ته پوءِ جيڪو ڏاڍو هوندو ان جي ئي ڳالهه مڃي ويندي.
هن چيو ته اسان هميشه سپريم ڪورٽ جا فيصلا تسليم ڪيا آهن، اسان آئين سان گڏ ۽ پي ڊي ايم جي خلاف آهيون.
اڳوڻي وزيراعظم چيو ته هو پهرين ڏينهن کان چئي رهيو آهي ته اليڪشن جي تاريخ تي هر ڪنهن سان ڳالهيون ڪرڻ لاءِ تيار آهي.
عمران خان صحافين آڏو شاهه محمود قريشي ۽ فواد چوڌري کي هدايت ڪندي چيو ته جيڪڏهن حڪومت فوري طور اسيمبلي ٽوڙي چونڊون ڪرائڻ چاهي ٿي ته پوءِ انهن سان ڳالهيون ڪيون وڃن، ٻي صورت ۾ هنن سان ڳالهيون ڪرڻ جي ڪا به ضرورت ناهي.
تحريڪ انصاف جي چيئرمين جو چوڻ هو ته هاڻي بال حڪومت جي ڪورٽ ۾ آهي، جيڪڏهن هي سموري ملڪ هڪ ئي ڏينهن اليڪشن ڪرائڻ چاهين ٿا ته جلدي ڪرائن.
ڪشمير بابت جنرل (ر) قمر جاويد باجوه ۽ حامد مير جي بيان تي عمران خان چيو ته مان ان کان وڌيڪ شيون ڄاڻان ٿو پر هي قومي سلامتي جو مسئلو آهي، مان نٿو چاهيان ته ملڪ جو نقصان ٿئي.
