وفاقي گهرو وزير راڻا ثناءُ الله چيو آهي ته عمران خان سياسي مخالفن سان ڳالهائڻ لاءِ تيار ناهي، سياسي مخالفت کي دشمني بڻائڻ وارو معاشرو نه هلي سگهندو، سڄي ملڪ ۾ صاف ۽ شفاف عام چونڊون هڪ ئي وقت تي ٿيڻ ضروري آهن، سورهن آگسٽ تي اسيمبلين جو آئيني مدو مڪمل ٿيندو، جنهن بعد نگران سيٽ تحت چونڊون ڪرايون وينديون.
فيصل آباد ۾ ميڊيا سان ڳالهائيندي وفاقي گهرو وزير راڻا ثناءُ الله چيو ته سڄي ملڪ ۾ هڪ ئي وقت اليڪشن ٿيڻ گهرجي، صاف ۽ شفاف چونڊون ملڪ لاءِ ضروري آهن.
هن چيو ته هڪ صوبي ۾ اليڪشن ٿيڻ بعد ٻين صوبن ۾ اليڪشن ٿيڻ سان نتيجا ڪير قبول ڪندو؟
راڻا ثناءُ الله چيو ته سورهن آگسٽ تي اسيمبلين جو آئيني مدو مڪمل ٿيندو، جنهن بعد نگران سيٽ تحت چونڊون ڪرايون وينديون.
وفاقي گهرو وزير چيو ته پي ٽي آءِ حڪومت سخت شرطن تي آءِ ايم ايف سان معاهدو ڪيو، عالمي مالياتي اداري جي چوڻ تي مجبور تيل جا اگهه وڌايا.
راڻا ثناءُ الله چيو ته عمران خان ملڪ کي وڳوڙن طرف وٺي وڃڻ چاهي ٿو، هڪ سازش تحت پي ٽي آءِ چيئرمين کي مڙهيو ويو.
سندس چوڻ هو ته عمران خان سياسي مخالفن سان ڳالهائڻ لاءِ تيار ناهي، سياسي مخالفت کي دشمني بڻائڻ وارو معاملو نه هلي سگهندو.
وفاقي گهرو وزير چيو ته اتحادي حڪومت ملڪي مسئلا حل ڪرڻ لاءِ ڪوششون وٺي رهي آهي، ملڪ ۽ قوم جي مفاد ۾ ڪيل فيصلا قبول ڪيا ويندا.
راڻا ثناءُ الله چيو ته عمران خان ملڪي تاريخ جو پهريون وزيراعظم آهي، جنهن خلاف بي اعتمادي واري رٿ ڪامياب ٿي، سندس پنهنجا ساٿي ئي کيس ڇڏي ويا، چئن ورهين دوران هن سياسي مخالفن کي جيل ۾ وجهڻ کانسواءِ ڪجهه به نه ڪيو.
