سينٽرل جيل ميرپورخاص ۾ پوليس جي مبينا ٿيڻ ۾ مارجي ويل ڪوٽ غلام محمد جي ڳوٺ نواب محمد يوسف ٽالپر واسي چينسر عرف ڏاڏو کوسو جي وارثن داخل ڪيل ڪيس ۾ ملوث جوابدارن کي گرفتار ڪرڻ ۾ پوليس خلاف عدم دلچسپي ظاهر ڪري ڇڏي.
چينسر کوسو جي پيرسن امڙ ۽ ڀائرن ميڊيا سان ڳالهائيندي الزام هڻندي چيو ته پيسا نه ڏيڻ تي پوليس ظالماڻو سخت تشدد ڪري چنيسر کوسو کي قتل ڪري ڇڏيو.
هنن چيو ته عدالت جي حڪم تي چنيسر کوسو جو اغوا ۽ قتل جو ڪيس داخل ڪيو ويو آهي پر ان باوجود پوليس اڃا تائين نامزد جوابدارن جي گرفتاريءَ لاءِ ڪک ڀڃي ٻيڻو نه ڪيو آهي.
سندن چوڻ هو ته خدشو آهي بااثرن جي مداخلت تي پوليس قاتلن کي بچائڻ جي ڪوشش ڪري رهي آهي.
هنن اعليٰ اختيارين کان مطالبو ڪيو ته ڪيس ۾ نامزد سمورن جوابدارن کي گرفتار ڪري کين سزا ڏياري انصاف ڏياريو وڃي.
کوسا ڊيوولپمينٽ آرگنائيزيشن سنڌ جي صدر عبدالحڪيم کوسي، فقير رسول بخش کوسي ۽ ٻين چينسر عرف ڏاڏو کوسو جي وارثن سان تعزيت ڪري ڏک ۽ افسوس جو اظهار ڪيو.
ان موقعي تي اڳواڻن ميڊيا سان ڳالهائيندي چيو ته چنيسر کوسو کي تشدد ڪري قتل ڪرڻ افسوس جوڳو عمل آهي، بنا ڪنهن دير جي چنيسر کوسو جي ڪيس ۾ ملوث جوابدارن کي گرفتار ڪري قانون جي ڪٽهڙي ۾ آندو وڃي.
هنن چيو ته چنيسر کوسو جي قاتلن کي انجام تائين پهچائڻ لاءِ سندس وارثن سان ڀرپور ساٿ رهندو، انصاف نه ملڻ جي صورت ۾ روڊن تي نڪري احتجاج ڪيا ويندا.
هنن چيف جسٽس سپريم ڪورٽ، چيف جسٽس سنڌ هاءِ ڪورٽ ۽ ٻين وس وارن کان مطالبو ڪيو ته پاڻمرادو نوٽيس وٺي پورهيت چنيسر کوسو جي خون سان انصاف ڪيو وڃي.
