ٽرانسپورٽ واري صوبائي وزير شرجيل ميمڻ جي هدايت تي عيد جي موقعي تي مسافرن کان واڌو ڪرايو وٺندڙ ٽرانسپورٽرن خلاف ٽئين ڏينهن به ڪارروايون جاري رهيون.
ٽرانسپورٽ واري سيڪريٽري عبدالحليم شيخ آفيسرن کي مسافرن کان ناجائز ڪرايو وصول ڪندڙن خلاف سخت ڪارروائي جي هدايت ڪئي.
ڪراچي ۾ مختلف علائقن لاءِ ٽرانسپورٽ کاتي جون ڌار ڌار ٽيمون جوڙيون ويون آهن، جيڪي صبح ۽ رات جي شفٽن ۾ ڪاررواين ۾ مصروف آهن.
ڪراچي ۾ رات ۽ اڄ ڏينهن دوران ڪاررواين ۾ 289 گاڏيون چيڪ ڪري مسافرن کي 5 لک 51 هزار رپيا واپس ڪيا ويا.
ڊسٽرڪٽ ريجنل ٽرانسپورٽ اٿارٽي ڄامشورو انڊس هاءِ وي تي موٽر وي پوليس سان گڏ ڪارروائي ڪندي ٻن ڪوچن جا ڪاغذ ضبط ڪري ڇڏي، جڏهن ته سندن روٽ جا اجازت نامو به رد ڪرڻ جي سفارش ڪئي وئي.
ٽرانسپورٽ کاتي جي آفيسرن شهيد بينظير آباد ۾ موٽروي پوليس سان گڏ 30 گاڏيون چيڪ ڪيون، جتي واڌو ڪرايو وٺندڙ نون گاڏين کي چالان ڪيو ۽ 8 هزار رپيا ڏنڊ وڌو ويو، 10 هزار واپس ڪرايا ويا.
سکر ملتان موٽر وي تي روهڙي ويجهو ڪارروائي ۾ ٽرانسپورٽرن تي 58 سئو رپيا ڏنڊ وڌو ويو ۽ 12 هزار رپيا مسافرن کي واپس ڪرايا ويا.
ٺٽي ۾ 25 گاڏيون چيڪ ڪري مسافرن کي 75 سئو رپيا واپس ڪرايا ويا، شڪارپورٽ واڌو ڪرايو وٺندڙ ٽرانسپورٽرن تي 5 هزار ڏنڊ وجهي 43 سئو رپيا مسافر کي واپس ڪرايا ويا، لاڙڪاڻي ۾ 40 گاڏيون چيڪ ڪري 22 هزار رپيا ڏنڊ وڌو ويو ۽ مسافرن کي 16 هزار 600 رپيا واپس ڪيا ويا.
بدين ۾ ٽرانسپورٽ جي آفيسرن واڌو ڪرايو وصول ڪرڻ تي 7 هزار رپيا ڏنڊ وڌو ۽ 11 هزار 500 رپيا مسافرن کي واپس ڪيا، مٺي، سانگهڙ ۽ ٻين ضلعن ۾ به وڌيڪ ڪرايو وٺندڙن خلاف مهم جاري آهي، جيڪا عيد جي موڪلن تائين جاري رهندي.
