غزه ۾ اسرائيلي فورسز جو بيگناهه فلسطينين تي بربريت جو سلسلو جاري آهي، گذريل 24 ڪلاڪن دوران 42 فلسطيني اسرائيلي دهشتگردي جو نشانو بڻيا.
عرب ميڊيا موجب، يهودي هوائي فوج گهرن ۽ پناهگير ڪيمپن کي نشانو بڻايو، اتر غزه ۾ اسرائيلي حملي ۾ 6 فلسطيني شهيد ۽ ڪيترائي زخمي ٿيا.
عرب ميڊيا موجب، خان يونس ۾ بمباري سبب ٻار سميت 2 فلسطيني شهيد ٿي ويا جڏهن ته غزه ۾ ڪاليج ۽ رهائشي عمارت تي اسرائيلي بمباري سبب 9 ڄڻن شهادت جو جام پيتو.
عرب ميڊيا موجب، اسرائيلي فورسز جي ڪارروائي دوران گذريل 24 ڪلاڪن دوران 42 فلسطيني شهيد ۽ 107 زخمي ٿيا.
عرب ميڊيا جو وڌيڪ چوڻ آهي ته 7 آڪٽوبر 2023 کان هن وقت تائين اسرائيلي حملن ۾ 40 هزار 861 فلسطيني شهيد ۽ 94 هزار 398 زخمي ٿي چڪا آهن.
ٻئي پاسي اسرائيلي ميڊيا جو چوڻ آهي ته غزه ۾ اسرائيلي يرغمالين جي آزادي بابت امڪاني معاهدو اسرائيلي وزيراعظم نيتن ياهو جي ڪري تباهه ٿيو.
هوڏانهن سوئزرلينڊ جي حڪومت حماس تي پابندي بابت قانوني مسودي جي منظوري ڏئي ڇڏي آهي.
خابرو اداري موجب پابندي واري قانون جي مسودي ۾ حماس کي دهشتگرد تنظيم قرار ڏنو ويو آهي، جڏهن ته مسودي ۾ پابندين جي ڀڃڪڙي ڪندڙن لاءِ قيد يا ڏنڊ جي سزا به مقرر ڪئي وئي آهي.
خابرو اداري موجب حماس تي پابندي لڳائڻ واري قانون جو مسودو منظوري لاءِ پارليامينٽ ڏانهن موڪليو ويندو.
