غوثپور ۾ چئن مغوين الله ڏنو ٽانوري، حاجي خدا بخش ٽانوري، نور الدين بهلڪاڻي ۽ سڄڻ ميراڻي جي بازيابي لاءِ جي بازيابيءَ لاءِ وارثن پاران احتجاجي مظاهرو ڪري ڌرڻو هنيو ويو.
بهلڪاڻي اتحاد جي اڳواڻ غلام ياسين، عبدالفتاح بهلڪاڻي، محمد رمضان، مير محمد ٽانوري ۽ ٻين جي اڳواڻيءَ ۾ احتجاجي مظاهرو ڪري انڊس هاءِ وي تي ٽائر ساڙي ڌرڻو هڻي نعريبازي ڪئي وئي.
ڌرڻي سبب سنڌ، پنجاب ايندڙ ويندڙ ٽريفڪ معطل ٿي وئي ۽ گاڏين جون قطارون لڳي ويون.
احتجاج ڪندڙن ميڊيا سان ڳالهائيندي چيو ته ڪشمور ايٽ ڪنڌڪوٽ ضلعي تي ڏوهارين جو راڄ قائم آهي، هڪ ڏينهن ۾ 10 ماڻهو اغوا ٿين پيا پر پوليس جي ڪن تي جونءَ به نٿي چري.
هنن چيو ته پوليس جي دلاسن تي ڪوبه اعتبار ناهي رهيو، مغوين جي گهرن ۾ روڄ راڙو متل آهي پر ڪير به پڇڻ وارو ناهي.
احتجاج ڪندڙن اعليٰ اختيارين کان مطالبو ڪيو ته مغوين کي بازياب ڪرائي بيچيني ختم ڪئي وڃي.
ڊي ايس پي هيڊڪوارٽر ڌرڻي واري هنڌ پهچي اڳواڻن سان ڳالهيون ڪري ٽن ڏينهن جي مهلت جي خاطري بعد ڌرڻو ختم ڪرائي روڊ کولرائي ڇڏيو.
