غوثپور ويجهو ڪچي جي علائقي دراني مهر واري علائقي ۾ 18 مغوين جي بازيابيءَ ۽ روپوش ڏوهارين جي گرفتاريءَ لاءِ آپريشن دوران ايس ايڇ او شهيد ۽ ڊي ايس پي ڪنڌڪوٽ سميت 5 ڄڻا زخمي ٿي پيا جڏهن ته پوليس ٻن ڏوهارين کي مارڻ جي دعويٰ ڪئي آهي.
ايس ايس پي ڪشمور ڪنڌڪوٽ جي هدايتن تي ضلعي جي مختلف علائقن مان اغوا ٿيل 18 مغوين جي بازيابيءَ ۽ روپوش ڏوهارين جي گرفتاريءَ لاءِ مختلف ٿاڻن جي پوليس پاران بڪتر بند گاڏين جي مدد سان مهر دراني جي ڪچي واري علائقي ۾ آپريشن ڪيو پيو وڃي.
آپريشن دوران ڏوهارين طرفان پوليس تي جديد هٿيارن سان فائرنگ ۽ راڪيٽ لانچر جا گولا فائر ڪرڻ سبب هڪ ايس ايڇ او عبداللطيف ميراڻي شهيد ٿي ويو جڏهن ته ڊي ايس پي ڪنڌڪوٽ قلندر بخش سومري ۽ هڪ پوليس اهلڪار زخمي ٿي پيا.
پوليس ۽ ڏوهارين ۾ فائرنگ جي نتيجي ۾ ڳوٺ گاهي خان ڀيو واسي پورهيت محمد حسن ڀيو ۽ مسمات حاجاڻي سبزوئي سميت 4 ڄڻا زخمي ٿي پيا آهن.
پوليس آپريشن دوران ٻن ڏوهارين کي مارڻ جي دعويٰ ڪئي آهي.
پوليس جو چوڻ آهي ته شهيد ايڇ ايس او جو مڙهه ۽ ڊي ايس پي قلندر بخش سميت زخمين کي اسپتال منتقل ڪيو ويو آهي.
پوليس موجب، زخمي ڊي ايس پي قلندر بخش سومري کي سکر جي خانگي اسپتال منتقل ڪيو ويو.
پوليس موجب، ڏوهارين خلاف آپريشن هلندڙ آهي جڏهن ته وڌيڪ نفري به طلب ڪئي وئي آهي.
