عوامي مسلم ليگ جي سربراهه شيخ رشيد چيو آهي ته پي ٽي آءِ اڳواڻ فواد چوڌري جي گرفتاريءَ ۾ اليڪشن ڪميشن سياسي ڌر بڻجي وئي آهي، اليڪشن ڪميشن جو ڪم ڪيس داخل ڪرائڻ ناهي پر چونڊ ڪرائڻ آهي، حڪومت جا ارادا واضح ٿي چڪا آهن، عوام کي سمجهڻ گهرجي ته هي اليڪشن نه، ڪجهه ٻيو ڪرڻ وڃي رهيا آهن.
سماجي رابطن واري ويب سائيٽ ٽوئيٽر تي جاري ڪيل ٽوئٽ ۾ شيخ رشيد چيو ته پي ٽي آءِ اڳواڻ فواد چوڌري جي گرفتاريءَ ۾ اليڪشن ڪميشن سياسي ڌر بڻجي وئي آهي، آءِ ايم ايف جي شرطن کان اڳ گرفتارين جو دور شروع ٿي ويو آهي، جنهن بعد حڪومت جو روڊ تي ڪم تمام ٿي ويندو.
سندس چوڻ هو ته جيڪا قوم اليڪشن ڪميشن تي اعتبار نه ڪري رهي آهي اها اليڪشن جي نتيجن تي ڪهڙو اعتبار ڪندي، ننڍو ڀاءُ وزيراعظم آهي ۽ وڏي ڀاءُ جي ڏيهه اچڻ لاءِ پيرن ۾ مهندي لڳل آهي.
عوامي مسلم ليگ جي سربراهه شيخ رشيد چيو ته اليڪشن جو مطالبو ڪندڙ چونڊن تي وڃڻ لاءِ تيار ناهن، نيب ترميم مان فائدو حاصل ڪندڙ تمام جلد قوم جي احتساب جي ور چڙهي ويندا.
هن چيو ته ناڻي جي ذخيرا 4 بلين کان گهٽ ۽ آءِ ايم ايف جا شرط مٿان آهن، وزيرن جي جمع بازار لڳل آهي، سياسي، اقتصادي، معاشي ۽ توانائي جا بحران حڪومت جي ڳچيءَ ۾ پوڻ وارا آهن.
عوامي مسلم ليگ جي سربراهه شيخ رشيد چيو ته ملڪ جام آهي، حڪومت جو ڪم تمام آهي، فواد چوڌري جي گرفتاري باهه تي پيٽرول وارو ڪم ڪندي، هاڻي ملڪ اليڪشن بدران تشدد جي رستي هلي پيو آهي، فيصلا روڊن تي ٿيندا.
