وفاقي وزير شيري رحمان چيو آهي ته شهيد ذوالفقار علي ڀٽو جي 44 هين شهادت جي ڏهاڙي جي موقعي تي سندس همت، قربانين ۽ ملڪ ۽ قوم لاءِ ڪيل خدمتن کي خراج تحسين پيش ڪريان ٿي.
شهيد ذوالفقار علي ڀٽو جي ورسي جي موقعي تي جاري ڪيل پيغام ۾ پ پ اڳواڻ سينيٽر شيري رحمان چيو آهي ته 73ع جو متفقه آئين، ايٽمي طاقت ۽ جمهوريت جي خالق قائد عوام کي ڪڏهن به وساري نٿو سگهجي، شهيد ڀٽو عوام ۽ پارليامينٽ کي طاقت ۽ فيصلا ڪرڻ جو مرڪز بڻايو.
هن چيو ته قائد عوام کي عدالتي قتل ذريعي عوام کان ڌار ڪيو ويو، اهو فيصلو عدليه جي تاريخ تي هڪ ڪارو داغ آهي جيڪو اڄ تائين قائم آهي.
وفاقي وزير چيو ته هڪ منظم منصوبي تحت قائد عوام خلاف فيصلو ٻڌايو ويو، قائد عوام جي قتل ۾ اسان جي عدالتي نظام جيڪو ڪردار ادا ڪيو، ان سان ڪنڌ شرم کان جھڪي ٿا وڃن.
هن چيو ته اڳوڻي صدر آصف علي زرداري 2011ع ۾ شهيد ذوالفقار علي ڀٽو جي عدالتي قتل ۾ انصاف لاءِ ريفرنس داخل ڪرايو، جيڪو گذريل 12 سالن کان فائلن هيٺ دفن ٿيل آهي.
