قومي اسيمبليءَ پنجاب ۾ چونڊن لاءِ فنڊ جاري ڪرڻ واري رٿ اڪثريتي راءِ سان رد ڪري ڇڏي، اعظم نذير تارڙ جو چوڻ آهي ته پاڻمرادي نوٽيس کان شروع ٿيل ڪيس ۾ ٻه جج ڌار ٿي ويا، چئن ججن پٽيشن رد ڪئي، ڪنهن هڪ شخص کي خوش ڪرڻ لاءِ اليڪشن ڪرائڻ جو فيصلو ڏنو ويو، هن ايوان سڄي ملڪ ۾هڪ ئي ڏينهن چونڊون ڪرائڻ وارو ٺهراءُ منظور ڪيو.
قومي اسيمبلي جو اجلاس اسپيڪر راجا پرويز اشرف جي صدارت هيٺ ٿيو، جنهن دوران روڊ حادثي ۾ فوت ٿيل وفاقي وزير مفتي عبدالشڪور جي ثواب لاءِ فاتحه پڙهي وئي.
اجلاس دوران قانون واري وزير، اعظم نذير تارڙ وفاقي ڪابينا طرفان پنجاب ۾ چونڊن بابت فنڊ جاري ڪرڻ واري موڪليل سمري رٿ طور ايوان ۾ پيش ڪئي.
قومي اسيمبليءَ پنجاب ۾ چونڊن لاءِ 21 ارب رپيا فنڊ جي ضمني گرانٽ جي گهر رد ڪندي رٿ کي اڪثريتي راٰءِ سان رد ڪري ڇڏيو.
ان موقعي تي ڳالهائيندي قانون واري وفاقي وزير، اعظم نذير تارڙ چيو ته پاڻمرادي نوٽيس کان شروع ٿيل ڪيس ۾ ٻه جج ڌار ٿي ويا، چئن ججن پٽيشن رد ڪئي.
هن چيو ته ڪنهن هڪ شخص کي خوش ڪرڻ لاءِ اليڪشن ڪرائڻ جو فيصلو ڏنو ويو، هن ايوان سڄي ملڪ ۾هڪ ئي ڏينهن چونڊون ڪرائڻ وارو ٺهراءُ منظور ڪيو.
اعظم نذير تارڙ چيو ته سپريم ڪورٽ اسٽيٽ بئنڪ کي ڪنسوليڊيٽڊ فنڊ رقم ڪڍڻ جو حڪم ڏنو آهي، اسٽيڊنگ ڪميٽيءَ معاملي تي غور ڪيو، وفاقي ڪابينا ۽ ناڻي بابت اسٽيڊنگ ڪميٽيءَ معاملو پارليامينٽ ڏانهن موڪليو.
ان کان اڳ ايوان ۾ روڊ حادثي ۾ فوت ٿيل وفاقي وزير مفتي عبدالشڪور کي قومي اعزاز ڏيڻ وارو ٺهراءَ منظور ڪيو ويو.
ٺهراءَ وفاقي وزير مرتضيٰ جاويد عباسيءَ پيش ڪئي، جنهن کي اڪثريتي راءِ سان منظور ڪيو ويو.
پاس ڪيل ٺهراءَ ۾ مفتي عبدالشڪور کي لاڏاڻي تي ڏک جو اظهار ڪندي مطالبو ڪيو ويو ته سانحي بابت سموريون حقيقتون سامهون آنديون وڃن.
ان موقعي تي وفاقي گهرو وزير راڻا ثناءُ الله چيو ته مفتي عبدالشڪور جي گاڏيءَ سان حادثو پيش آيو، دهشتگردي جو ڪو به پاسو سامهون ناهي آيو، هيل تائين ٿيل جاچ موجب اهو هڪ حادثو هو.
هن چيو ته واقعي جي مختلف رخن کان جاچ جاري آهي.
قومي اسيمبلي جو اجلاس سڀاڻي ٻارهين وڳي تائين ملتو ڪيو ويو.
