حڪومت عام چونڊن جي خرچن بابت بل قومي اسيمبليءَ ۾ پيش ڪري ڇڏيو، ناڻي واري وفاقي وزير اسحاق ڊار جو چوڻ آهي ته فوري طور عام چونڊون ملڪي مفاد ۾ نه آهن، ضروري آهي ته سمورين اسيمبلين جي چونڊ هڪ ئي وقت ڪرائي وڃي.
قومي اسيمبلي جي اجلاس ۾ ڳالهائيندي اسحاق ڊار چيو ته پي ٽي آءِ سياسي حڪمت عملي تي ڪي پي ۽ پنجاب اسيمبلي ٽوڙي جيڪو غير آئيني عمل آهي.
هن چيو ته تحريڪ انصاف قيادت ملڪ ۾ مايوسي ۽ ڏڦيڙ پيدا ڪرڻ جي ڪوشش ڪري رهي آهي.
سندس چوڻ هو ته مخالفن جي خواهش آهي ته آءِ ايم ايف سان معاهدو نه ٿي ۽ ملڪ ڏيوالي جو شڪار ٿي وڃي.
اسحاق ڊار چيو ته سليڪٽيڊ حڪومت ملڪي معيشيت کي برباد ڪيو، سازشي عنصر هاڻي ملڪ کي نقصان پهچائڻ جون ڪوششون ڪري رهيا آهن.
هن چيو ته حڪومت معاشي بحران جي خاتمي لاءِ ڀرپور ڪوششون ڪري رهي آهي.
