قومي اسيمبليءَ ٺهراءُ منظور ڪندي سپريم ڪورٽ پريڪٽس اينڊ پروسيجر بل تي 8 رڪني لارجر بئنچ رد ڪندي ان کي فوري طور ٽوڙڻ جو مطالبو ڪيو آهي، اتفاقِ راءِ سان منظور ڪيل ٺهراءَ ۾ پارليامينٽ جي آئين ۽ قانونسازي جي اختيار ۾ سپريم ڪورٽ جي مداخلت تي ڳڻتي جو اظهار ڪيو ويو، ٺهراءَ ۾ چيو ويو آهي ته پارليامينٽ پنهنجي ڪم ۾ اعليٰ عدليا جي مداخلت ۽ فيصلن کي ڳڻتيءَ جي نظر سان ڏسي ٿي، ايوان سمجهي ٿو ته اٺ رڪني بئنچ کي فوري طور ٽوڙيو وڃي.
قومي اسيمبلي جو اجلاس اسپيڪر راجا پرويز اشرف جي صدارت هيٺ ٿيو، جنهن ۾ پ پ جي آغا رفيع الله پارليامينٽ جي بالادستي بابت ٺهراءُ پيش ڪيو، جيڪو ايوان اڪثريتي راٰءِ سان منظور ڪري ورتو.
ٺهراءَ ۾ چيو ويو ته پارليامينٽ آئين ۽ قانون ٺاهيندڙ ادارو آهي، آئين ٺاهڻ جو اختيار رڳو پارليامينٽ وٽ آهي.
منظور ڪيل ٺهراءَ ۾ چيو ويو ته پارليامينٽ پنهنجي ڪم ۾ اعليٰ عدليا جي مداخلت ۽ فيصلن کي ڳڻتيءَ جي نظر سان ڏسي ٿي.
ٺهراءِ ۾ چيو ويو ته سپريم ڪورٽ غير منصفاڻا فيصلا ڪري رهي آهي، تازي فيصلي مان ڌر بڻجڻ جو تاثر ملي رهيو آهي.
منظور ڪيل ٺهراءَ اهو به چيو ويو ته سپريم ڪورٽ واضح طور ورهايل نظر اچي رهي آهي.
ٺهراءَ موجب ايوان سپريم ڪورٽ طرفان تازو پارليامينٽ طرفان پاس ڪيل بل تي 8 رڪني بئنچ کي رد ڪري ٿي.
پاس ڪيل ٺهراءَ ۾ چيو ويو ته ان بئنچ ۾ ٻن سينيئر ترين ججن ۽ بلوچستان ۽ ڪي پي مان ڪو جج شامل نه ڪرڻ درست ناهي.
ٺهراءَ ۾ چيو يو ته ايوان سمجهي ٿو ته اٺ رڪني بئنچ کي فوري طور ٽوڙيو وڃي.
