لاهور هاءِ ڪورٽ تحريڪ انصاف جي صدر ۽ پنجاب جي اڳوڻي وڏي وزير چوڌري پرويز الاهي جي گرفتاريءَ لاءِ پوليس جا ڇاپا فوري طور روڪڻ جي درخواست رد ڪري ڇڏي.
لاهور هاءِ ڪورٽ ۾ پنجاب جي اڳوڻي وڏي وزير چوڌري پرويز الاهي جي گهر تي پوليس ۽ اينٽي ڪرپشن جي ڪارروائي خلاف داخل درخواست تي ٻڌڻي ٿي.
جسٽس سردار سرفراز ڊوگر، پرويز الاهي جي پٽ راسخ الاهي جي درخواست جي ٻڌڻي ڪئي.
ٻڌڻي دوران درخواست ڏيندڙ جي وڪيل چيو ته پنجاب جي اڳوڻي وڏي وزير جي گهر تي غير قانوني پوليس آپريشن ڪيو ويو، لاهور هاءِ ڪورٽ مان ضمانت وٺڻ باوجود پرويز الاهي کي گرفتار ڪرڻ جي ڪوشش ڪئي وئي.
عامر سعيد چيو ته پوليس پاران پرويز الاهي جي گهر تي ڇاپو عدالتي حڪم جي واضح ڀڃڪڙي آهي، عدالت چوڌري پرويز الاهي جي حفاظتي ضمانت منظور ڪئي آهي.
جسٽس سردار سرفراز ڊوگر چيو ته عدالت ڪهڙي قانون تحت گرفتاري کان روڪي سگهي ٿي؟، جيسيتائين رپورٽ نه ٿي اچي ڪيئن اوهان جي ڳالهه مڃي سگهون ٿا، پوليس کي پنهنجو زور لڳائڻ ڏيو، جڏهن معاملو عدالت ۾ ايندو ته ڏسي وٺندا.
عدالت آءِ جي پنجاب ۽ ڊي جي اينٽي ڪرپشن کي قانون جي دائري ۾ رهي ڪم ڪرڻ جي هدايت ڪندي ايندڙ ٻڌڻي تي ڊي جي اينٽي ڪرپشن ۽ آءِ جي پنجاب کان تفصيلي رپورٽ طلب ڪري ورتي.
واضح رهي ته چوڌري پرويز الاهي طرفان داخل درخواست ۾ اپيل ڪئي وئي هئي ته عدالت چيف سيڪريٽري کي ذميوارن خلاف ڪارروائي ۽ پوليس کي پرويز الاهي جي گرفتاري کان روڪڻ جو حڪم ڏئي.
