لاهور هائيڪورٽ، پي ٽي آءِ چيئرمين عمران خان کي هيسائڻ کان روڪي ڇڏيو آهي.
عمران خان 121 ڪيس خارج ڪرڻ لاءِ جلد ٻڌڻ واري درخواست جمع ڪرائي، جنهن کي لاهور هائيڪورٽ ٻڌڻي لاءِ مقرر ڪيو.
زمان پارڪ ۾ امڪاني آپريشن روڪڻ ۽ گهرائڻ واري نوٽيس خلاف عمران خان جي درخواست تي ٻڌڻي چيف جسٽس جي سربراهيءَ ۾ 5 رڪني لارجر بئنچ ڪئي.
سرڪاري وڪيل عدالت کي ٻڌايو ته وٽس ايڪشن جو ڪو به اطلاع ناهي.
عمران خان جي وڪيل چيو ته انتظاميا پنهنجن اختيارن جو مسلسل غلط استعمال ڪري رهي آهي.
عدالت رمارڪس ڏنا ته ان ئي نوعيت جي درخواست تي ٻڌڻي 2 مئي لاءِ مقرر آهي، ايڏي تڪڙ ڪهڙي آهي جو ٻي درخواست داخل ڪرائڻي پئي.
عمران خان جي وڪيل چيو ته ٽن مهينن جو رڪارڊ موجود آهي، ڪيس داخل ناهي ٿيندو ۽ آپريشن شروع ڪيو ويندو آهي.
پي ٽي آءِ چيئرمين عمران خان روسٽرم تي اچي عدالت کي ٻڌايو ته کيس لڳي ٿو ته عيد تي هي ايڪشن ڪندا، هي اڳ به ائين ڪري چڪا آهن، اسلام آباد پيشي لاءِ ويو ته سندس گهر آپريشن ڪيو ويو.
عدالت دليل ٻڌڻ بعد فيصلو محفوظ ڪري ورتو، جيڪو ڪجهه دير کان پوءِ ٻڌائيندي عمران خان کي هيسائڻ کان روڪي ورتو.
