لاهور ۾ پوليس ۽ اينٽي ڪرپشن ٽيم جي پي ٽي آءِ صدر ۽ پنجاب جي اڳوڻي وڏي وزير چوڌري پرويز الاهي جي گرفتاري لاءِ چڙهائي ڪري 8 ڪلاڪن تائين سرچ آپريشن ڪيو، پرويز الاهي هٿ نه آيو، پوليس ملازمن سميت 27 ماڻهن کي گرفتار ڪري ورتو.
ڊي جي ائنٽي ڪرپشن پنجاب سهيل ظفر چٺا ۽ ايس ايس پي ماڊل ٽائون جي اڳواڻيءَ ۾ پوليس نفري پرويز الاهي جي گهر تي چڙهائي ڪئي، دروازو نه کولڻ تي پوليس بڪتر بند گاڏي ذريعي پنجاب جي اڳوڻي وڏي وزير جي گهر جو دروازو ڀڃي ڇڏيو.
پوليس پرويز الاهي جي گهر ٻاهران چوڌري ظهور الاهي روڊ بند ڪري ڪارروائي ڪري، اهلڪار ڀتيون ٽپي اندر داخل ٿيا، پوليس پرويز الاهي ۽ راسخ الاهي جي گهرن جي ڪنڊ ڪنڊ جي جهڙتي ورتي ويئي، جنهن دوران گهرن اندر ڀڄ ڊاهه پڻ ڪئي ويئي، ليڊيز پوليس اهلڪار پڻ موجود هيون، سرچ آپريشن دوران ملازمن کي تشدد جو نشانو پڻ بڻايو ويو، جڏهن ته موٽ ۾ پٿراءُ ۽ پوليس اهلڪارن تي پاڻي هاريو ويو.
چوڌري پرويز الاهي هٿ نه آيو، ملازمن سميت 27 ڄڻن کي حراست ۾ ورتو ويو، اٽڪل 8 ڪلاڪن جي آپريشن کانپوءِ پوليس واپس رواني ٿي ويئي.
ائنٽي ڪرپشن ٽيم گوجرانوالا ۾ پرويز الاهي تي داخل ڪيس ۾ ڪارروائي ڪئي، پوليس اختيارين موجب پرويز الاهي جي ان ڪيس ۾ ضمانت ٿي آهي ته عدالت جو آرڊر ڏيکاريو وڃي.
ڊي جي اينٽي ڪرپشن پنجاب سهيل ظفر چٺا جو چوڻ هو ته هو پرويز الاهي کي گرفتار ڪرڻ آيو آهن، پرويز الاهي جي گهر ڀاتين سهڪار نه ڪيو، پوليس تي پيٽرول اڇلايو ويو ۽ پٿراءُ ڪيو ويو، مزاحمت تي پوليس ائڪشن ورتو.
پرويز الاهي جي وڪيل عامر سعيد جو چوڻ هو ته جسٽس طارق سليم شيخ 6 مئي تائين گرفتاري کان اڳ واري ضمانت منظور ڪئي، هاءِ ڪورٽ جو تصديق ٿيل آرڊر سدائين ٻئي ڏينهن تي ملندو آهي، پر پوءِ به ڪارروائي ڪئي وئي.
پوليس ڪارروائي دوران پي ٽي آءِ ڪارڪنن جو وڏو انگ پرويز الاهي جي گهر ٻاهران پهتو، ڪارڪنن حڪومت خلاف ۽ پرويز الاهي جي حق ۾ نعريبازي ڪئي.
هوڏانهن پي ٽي آءِ اڳواڻن پوليس ڇاپي جي مذمت ڪئي آهي. مونس الاهي جو چوڻ آهي ته ملڪ ۾ قانون جي حڪمراني ختم ٿي ويئي آهي، پوليس ان ڪيس ۾ پرويز الاهي کي گرفتار ڪرڻ آئي جنهن ۾ ضمانت ٿي چڪي آهي.
فواد چوڌري چيو آهي ته هڪ پاسي ڳالهيون ٻئي پاسي گرفتاري، ڳالهه سمجهه کان ٻاهر آهي، ثابت ٿي ويو ته پي ٽي آءِ سان ڳالهيون ڪندڙ حڪومتي ميمبرن اسحاق ڊار، سعد رفيق ۽ اعظم نذير تارڙ جي پنهنجي حڪومت ۾ ڪابه حيثيت ناهي.
