لاڙڪاڻي ۾ صحافين، ليکڪن ۽ سول سوسائٽي جي تنظيم جي ڊبليو سي پاران پروفيسر ڊاڪٽر اجمل ساوند جي قاتلن جي گرفتاريءَ ۽ قبيلائي جهيڙن خلاف احتجاجي ريلي ڪڍي ڌرڻو هنيو ويو.
جي ڊبليو سي جي مرڪزي صدر ذوالفقار خاصخيلي، نائب صدر ظفر ابڙي، مرڪزي جنرل سيڪريٽري شوڪت نوناري ۽ ٻين جي اڳواڻيءَ ۾ احتجاجي ريلي ڪڍي ڊي آءِ جي آفيس اڳيان ڌرڻو هڻي نعريبازي ڪئي وئي.
احتجاجي ريلي ۽ ڌرڻي ۾ جي يو آءِ، ايس يو پي، جسقم ۽ سني تحريڪ سميت صحافين، وڪيلن، ڊاڪٽرن، شاگردن، اديبن، دانشورن ۽ شهرين وڏي انگ ۾ شرڪت ڪئي.
جي ڊبليو سي جي مرڪزي صدر ذوالفقار خاصخيلي، ظفر ابڙي، شوڪت نوناري ۽ ٻين ريلي کي خطاب ڪندي چيو ته پروفيسر ڊاڪٽر اجمل ساوند جو قتل سنڌ جي شعور جو قتل آهي، جنهن جي جيتري مذمت ڪجي اها گهٽ آهي، پوليس اڃا تائين سندس قاتلن کي گرفتار ناهي ڪري سگهي.
هنن چيو ته فرانس مان پي ايڇ ڊي ڪري اتان جي نوڪري ڇڏي پنهنجي ماڻهن کي تعليم ڏيارڻ لاءِ آيل پروفيسر اجمل ساوند کي قتل ڪري جهالت جي انتها ڪئي وئي آهي.
سندن چوڻ ه ته قبيلائي تڪرارن جي ڪري سنڌ جو تعليم يافته ۽ نوجوان نسل هٿ سان تباهه ڪيو پيو وڃي جنهن جو ذميوار ڀوتارڪو نظام آهي.
اڳواڻن اعليٰ اختيارين کان مطالبو ڪيو ته فوري طور پروفيسر اجمل ساوند جي قتل ۾ ملوث سمورن ڪردارن کي گرفتار ڪري انصاف تائين پهچايو وڃي ٻي صورت ۾ احتجاج جو دائرو وڌايو ويندو.
جي ڊبليو سي جي احتجاجي ريلي ۽ ڌرڻي کي ايس يو پي اڳواڻ ڊاڪٽر مظهر مغل، جسقم اڳواڻ ڏاڏو اطهر سومري، ڊسٽرڪٽ بار ايسوسي ايشن جي صدر ايڊووڪيٽ رفيق ابڙي ۽ ٻين پڻ خطاب ڪيو.
