لاڙڪاڻو پوليس مبينا مقابلي ۾ ٻن ڏوهارين کي زخمي حالت ۾ گرفتار ڪري هٿيار ۽ موٽرسائيڪل هٿ ڪرڻ جي دعوي ڪئي آهي.
تعلقي ٿاڻي جي حد حيدر شاهه لاڙي وٽ پوليس ۽ ڏوهارين وچ ۾ مبينا مقابلو ٿي پيو.
پوليس مقابلي دوران ٻن ڏوهارين کي زخمي حالت ۾ گرفتار ڪري هٿيار ۽ موٽرسائيڪل هٿ ڪري ورتي.
ايس ايس پي لاڙڪاڻو ڊاڪٽر محمد عمران خان ٻڌايو ته گرفتار ڏوهارين جي سڃاڻپ سائين ڏنو پٽ فقير محمد ککراڻي ۽ وقار پٽ غلام شبير عرف بشير مهر طور ٿي آهي.
هن چيو ته ٻئي ڏوهاري لاڙڪاڻي ضلعي جي مختلف علائقن ۾ ڪيترن ئي ڏوهن ۽ ڪيسن ۾ ملوث آهن.
سندس چوڻ هو ته سائين ڏنو ککراڻي مٿان مختلف ٿاڻن تي 10 کان وڌيڪ ڪيس داخل آهن جڏهن ته وقار مهر مٿان 15 کان وڌيڪ ڪيس داخل آهن.
ايس ايس پي ڊاڪٽر محمد عمران خان چيو ته ٻئي عادي ڏوهاري آهن وڌيڪ جاچ ڪئي پئي وڃي.
