ماحولياتي تبديلي واري وفاقي وزير شيري رحمان چيو آهي ته ماحولياتي تبديلي هن صديءَ جو وجودي چئلينج آهي، عالمي گرين هائوس گيس خارج ڪرڻ پاڪستان جو حصو هڪ سيڪڙو کان به گهٽ آهي، پر متاثر ملڪ ۾ پاڪستان ٽاپ ٽين ۾ شامل آهي.
شنگهائي ڪوآپريشن آرگنائيزيشن جي چوٿين وزارتي اجلاس کي خطاب ڪندي شيري رحمان چيو ته هو برداشت نه ڪرڻ جي هيٽ ويوِ، ٻوڏن، گليشئير ڳرڻ ۽ ٻين ماحولياتي اثرن جو مقابلو ڪري رهيا آهن.
هن چيو ته گذريل سال ٻوڏ سبب 32 ملين ماڻهو متاثر ٿيا ۽ 30 بلين کان وڌيڪ معاشي نقصان ٿيو، ماحولياتي ايجنڊا حڪومت جي پهرين ترجيح آهي.
شيري رحمان چيو ته هو ماحولياتي تبديلي جي اثرن کي منهن ڏيڻ لاءِ سرگرم آهن ۽ ڪيترائي قدم کنيا پيا وڃن.
وفاقي وزير چيو ته ماحولياتي تبديلي جي چئيلنج کي منهن ڏيڻ لاءِ تيز قومي، علائقائي ۽ عالمي ردعمل جي ضرورت آهي، کين ايندڙ نسل لاءِ جٽادار مستقبل جي ضمانت ڏيڻ لاءِ هاڻي عمل ڪرڻو پوندو.
