وزيراعظم شهبازشريف چيو آهي ته اتحادي حڪومت کي سال مڪمل ٿي ويو، مخالف پريشان آهن ته حڪومتي اتحاد اڃا تائين ٽٽو ڇو ناهي، هڪ قانون جيڪو اصل شڪل ۾ آيو ئي ناهي ان بابت ٽي رڪني بئنچ چيو ته لاڳو نه ٿيندو، آءِ ايم ايف سان معاهدو آخري مرحلي ۾ آهي، ثاقب نثار حنيف عباسي کي شڪست ڏيارڻ لاءِ شيخ رشيد جي ايجنٽ جو ڪردار ادا ڪيو، تعليم ۽ صحت جي ميدان ۾ سياست جي اجازت نه هجڻ گهرجي.
وزيراعظم شهبازشريف جي صدارت هيٺ اتحادي پارٽين جو اجلاس ٿيو، جنهن ۾ حادثي ۾ فوت ٿيل وفاقي وزير مفتي عبدالشڪور جي لاڏاڻي تي ڏک جو اظهار ڪري فاتحه پڙهي وئي.
اجلاس دوران ملڪ جي تازي سياسي صورتحال سميت ٻين معاملن تي خيالن جي ڏي وٺ ڪئي وئي، وزيراعظم شهبازشريف، جماعت اسلامي جي امير سراج الحق سان ٿيل ملاقات بابت آگاهه ڪيو، جڏهن ته پ پ ڳالهين بابت سياسي پارٽين سان ٿيل صلاح مشوري بابت آگاهي ڏني.
ان موقعي تي خطاب ڪندي وزيراعظم چيو ته حڪومت کي سال مڪمل ٿي ويو آهي، هڪ تاثر هو ته هي اتحاد گهڻي دير نه هلي سگهندو.
هن چيو ته سال دوران بحرانن ۽ چئلينجن جو مقابلو ڪيو، هڪ ٻئي جي ٻڌڻ جمهوريت جو حسن آهي، مخالف پريشان آهن ته اڃا تائين اتحاد ٽٽو ڇو ناهي؟
وزيراعظم چيو ته هڪ قانون جيڪو اصل شڪل ۾ آيو ئي ناهي ان بابت ٽي رڪني بئنچ چيو ته لاڳو نه ٿيندو، بار ڪائونسلن به چيو ته غلط فيصلو ٿيو آهي.
شهبازشريف چيو ته آءِ ايم ايف سان معاهدو آخري مرحلي ۾ آهي، اسحاق ڊار ان لاءِ ڏينهن رات ڪم ڪيو.
ان کان اڳ راولپنڊي ۾ ميڊيا سان ڳالهائيندي وزيراعظم شهباز شريف چيو ته مريضن جو علاج ڪرڻ وڏي عبادت آهي، اسپتال جي اڏاوت تي 5 ارب رپيا خرچ ٿي چڪا آهن.
هن چيو ته ثاقب نثار حنيف عباسي کي شڪست ڏيارڻ لاءِ شيخ رشيد جي ايجنٽ جو ڪردار ادا ڪيو.
شهبازشريف چيو ته ثاقب نثار غريبن کي انصاف نه پر سياسي دڪان چمڪائڻ لاءِ عدالت لڳائي هئي.
وزيراعظم چيو ته عوامي خدمت جي ميدان ۾ سياست کي غلط قرار ڏيندي چيو ته تعليم ۽ صحت جي ميدان ۾ سياست جي اجازت نه هجڻ گهرجي.
شهبازشريف چيو ته گذريل حڪومت هن اسپتال کي رديءَ جي ٽوڪري ۾ اڇلائي ڇڏيو هو، پر ڪورونا دوران به اسپتال وڏيون خدمتون سرانجام ڏنيون.
