مخالف ڌر سان ڳالهين واري معاملي تي اختلاف سبب حڪومتي اتحادي پارٽين جو اجلاس بنا ڪنهن اتفاق راءِ جي ختم ٿي ويو، جي يو آءِ پاران پي ٽي آءِ سان ڳالهين جي مخالفت ڪئي وئي، جڏهن ته ايم ڪيو ايم، بي اين پي ۽ خالد مگسيءَ طرفان بلاول ڀٽو زرداري جي ڳالهين واري موقف جي حماتي ڪئي.
وزيراعظم هائوس ۾ حڪومتي اتحادي پارٽين جي اجلاس جي اندروني ڪهاڻي سامهون اچي وئي آهي.
حڪومتي اتحادي پارٽين جي اجلاس ۾ پ پ چيئرمين بلاول ڀٽو زرداريءَ مخالف ڌر سان ڳالهين لاءِ اصرار ڪيو.
ايم ڪيو ايم، بي اين پي، چوڌري سالڪ، محسن داوڙ ۽ خالد مگسيءَ طرفان بلاول ڀٽو زرداري جي موقف جي حمايت ڪئي وئي پر جي يو آءِ مخالفت ڪئي.
جي يو آءِ موقف اختيار ڪيو ته عمران خان ڪا سياسي قوت ناهي، ان ڪري هو ساڻس ڳالهين جي مخالفت ڪن ٿا.
ان موقعي تي زين بگٽي چيو ته هو ڳالهين جي مخالفت نه ٿو ڪري پر عمران خان هڪ ڪوڙو شخص آهي، جنهن تي ڀروسو نه ٿو ڪري سگهجي.
ذريعن موجب بلاول ڀٽو زرداري ان دوران چيو ته ڳالهين جا در بند ڪرڻ سندن اصولن خلاف، غير جمهوري ۽ غير سياسي عمل آهي.
هن چيو ته ڳالهيون وقت جي ضرورت آهن، ڳالهين سان ئي ملڪ کي بحرانن مان ڪڍيو وڃي.
مخالف ڌر سان ڳالهين واري معاملي تي اختلاف بعد حڪومتي اتحادين جو اجلاس بنا ڪنهن اتفاقءِ راءِ جي ختم ٿي ويو.
