ڄامشوري ۾ سنڌي ادبي بورڊ جي چيئرمين مخدوم سعيد الزمان عاطف، بورڊ جي جديد ٽيڪنالوجي، جي ڇپائي واري شعبي جو افتتاح ڪري ڇڏيو.
ان موقعي تي سنڌي ادبي بورڊ جي چيئرمين مخدوم سعيد الزمان عاطف چيو ته سنڌي ادبي بورڊ جو ڇپائي وارو شعبو اداري جي ڪرنگهي جي هڏي جي حيثيت رکي ٿو، ان کي وڌيڪ فعال ڪرڻ ۽ ترقي ڏيارڻ لاءِ اسان وٽ مختلف پروگرام آهن.
هن چيو ته منهنجي خواهش هئي ته بورڊ جي پبليڪيشن شعبي کي وڌيڪ فعال بڻائڻ ۽ ان کي جديد انداز سان تحرڪ ۾ آڻڻ لاءِ هڪ وڏي ڪشادي آفيس قائم ڪئي وڃي ته جيئن هن شعبي جا ورڪر پنهنجي ڪم کي وڌيڪ آسانيءَ سان سرانجام ڏئي سگهن.
مخدوم سعيد الزمان عاطف چيو ته ڪيترائي اڻڇپيل مسودا گرانٽ جي ناڪافي هجڻ سبب سالن کان ڇپائي لاءِ بورڊ ۾ رکيل آهن، ان کانسواءِ بورڊ جي لائبريري ۾ به ناياب قلمي نسخا پڻ موجود آهن، جن کي شايع ڪري منظر عام تي آڻڻ تمام ضروري آهي، ته جيئن سنڌ جي عالمن جو قلمي پورهيو عام پڙهندڙن تائين پهچائي سگهجي.
سنڌي ادبي بورڊ جي چيئرمين وڌيڪ چيو ته منهنجي خواهش آهي ته سڄي سنڌ مان نامياري عالمن ۽ اديبن جا قلمي نسخا گهرائي سنڌي ادبي بورڊ ۾ محفوظ ڪيا وڃن.
مخدوم سعيد الزمان عاطف چيو ته اسان سنڌي ادبي بورڊ ۾ رکيل مخطوطن جي ڇپائي لاءِ اسڪيم جوڙي آهي، ڇپائي لاءِ اسان کي اسپيشل فنڊ ڏنو وڃي يا وري سنڌ حڪومت پاڻ اهي مخطوطا ڇپرائي ڏي، ته جيئن سنڌ جي عالمن ۽ محققن جو قلمي پورهيو محفوظ ٿي سگھي.
سنڌي ادبي بورڊ جي چيئرمين، پبلڪيشن آفيسر کي هدايتون ڏيندي چيو ته پنهنجي شعبي جي ڪم ڪار ۾ تيزي آڻين، ته جيئن سنڌي ادبي بورڊ طرفان وڌ کان وڌ ڪتاب شايع ڪري سگهجن.
ان موقعي تي سنڌي ادبي بورڊ طرفان سنڌي ترجمي سان شايع ڪرايل “قرآن مجيد”جو مهورت پڻ ڪيو ويو.
