سنڌ جي وڏي وزير مراد علي شاهه ڪراچي ۾ مظاهرن دوران ڀڃڊاهه ڪندڙن جي گرفتاري جو حڪم ڏئي ڇڏيو، سندس چوڻ آهي ته شهر ۾ ڏڦيڙ ۽ ملڪيتن کي نقصان پهچائڻ جي اجازت نه ڏني ويندي، قانون لاڳو ڪندڙ ادارن کي هدايت ڪئي آهي ته ملڪيتن جي حفاظت ڪئي وڃي.
رات دير سان وڏي وزير مراد علي شاهه شهر جي مختلف علائقن جو دورو ڪيو ۽ انتظاميا کي ضروري هدايتون ڏنيون.
وڏي وزير مراد علي شاهه قانون لاڳو ڪندڙ ادارن کي هدايتون جاري ڪيون آهن ڪراچي ۾ ڏڦيڙ پکيڙڻ ۽ سرڪاري توڙي خانگي ملڪيتن کي نقصان پهچائڻ جي اجازت نه ڏني وڃي.
سندس چوڻ هو ته قانون لاڳو ڪندڙ ادارا سرڪاري توڙي خانگي ملڪيتن جي حفاظت کي يقيني بڻائن.
وڏي وزير مراد علي شاهه چيو ته احتجاج جي نالي تي ٻن بائوزرن، هڪ بس ۽ هڪ چيڪ پوسٽ کي باهه ڏني وئي جنهن جو حساب انهن کان ورتو ويندو.
هن چيو ته ڀڃڊاهه بعد شهر ۾ صفائي سٿرائي ڪئي وئي آهي ۽ هاڻي جيڪڏهن ڪنهن وڳوڙي ڪا حرڪت ڪئي ته سختي سان منهن ڏنو ويندو.
وڏي وزير مراد علي شاهه ماڻهن کي هدايت ڪندي چيو ته هو پنهنجي پنهنجي ڪم تي وڃن ڪنهن کي به کين روڪڻ جي جرئت نه ٿيندي، احتجاج جي آڙ ۾ عوام جي جان ۽ مال کي نقصان پهچائيندڙن کي سختي سان منهن ڏنو وڃي، شهر ۾ احتجاج جي نالي تي ڦرلٽ ڪندڙن خلاف لاڳاپيل ٿاڻن جي پوليس ڪارروائي عمل ۾ آڻي.
