امريڪي اخبار دعويٰ ڪئي آھي تھ مصر روس کي 40 ھزار راڪيٽس ڳجھي طور ڏيڻ جو منصوبو بڻايو آھي.
پرڏيھي ميڊيا موجب، امريڪي اخبار واشنگٽن پوسٽ پنھنجي رپورٽ ۾ دعويٰ ڪئي آھي تھ مصر روس -يوڪرين جنگ دوران روس کي ھٿيار سپلاءِ ڪرڻ ۾ مدد لاءِ ڳجھي طور 40 ھزار راڪيٽس ڏيڻ جو منصوبو بڻايو آھي جنھن جا تفصيل امريڪي انٽيليجنس جي ليڪ دستاويزن سان حاصل ڪيا ويا آھن.
رپورٽ موجب، مصر جي صدر عبدالفتح السيسي اعليٰ عسڪري اختيارين سان ھڪ اھم گڏجاڻي بھ ڪئي آھي جنھن ۾ روس کي فوجي بنيادن تي ھٿيارن جي فراھمي تي ڳالھھ ڪئي وئي جڏھن تھ ان دوران مصر جي صدر اختيارين کي اھا منصوبابندي ڳجھي رکڻ جي ھدايت ڪئي.
رپورٽ ۾ چيو ويو آھي تھ امريڪي انٽيليجنس جي ليڪ دستاويزن تي 17 فيبروري جي تاريخ داخل آھي، ميڊيا رپورٽس موجب مصر جي طرفان روس کي راڪيٽس جي فراھمي جي خبرن تي امريڪي اختيارين حيراني جو اظھار ڪيو آھي.
امريڪي اختيارين جو چوڻ آھي تھ جيڪڏھن مصر جي صدر طرفان روس کي ڳجھي طور تي راڪيٽس فراھمي جون خبرون سچيون آھن تھ ٻنھي ملڪن جي لاڳاپن کي سنجيدگي سان ڏسڻ جي ضرورت آھي.
ٻئي طرف امريڪي قومي سلامتي جي ترجمان جان ڪربي ڳجھي دستاويزن تي ڪو بھ تبصرو نھ ڪيو آھي.
