بچاءَ واري وزير خواجه آصف چيو آهي ته غير يقيني ۽ غير مستحڪم صورتحال آهي، معاشي بحران سياسي عدم استحڪام جو سبب آهي.
سيالڪوٽ ۾ ميڊيا سان ڳالهائيندي خواجه آصف چيو ته سندس خيال ۾ سياسي استحڪام اچڻ گهرجي، جيڪڏهن اڳتي وڌڻو آهي ته استحڪام ۽ هڪ تسلسل گهرجي.
هن چيو ته تسلسل ۽ استحڪام آئين جي دائري ۾ رهي ڪري ئي ممڪن آهي.
سندس چوڻ هو ته جيڪڏهن ذاتي خواهشون حاصل ڪرڻ لاءِ ڊوڙون لڳل رهنديون ته پوءِ وطن ۽ قوم جي خواهش پوري نه ٿيندي، سمورن طبقن کي ذاتي خواهشن بدران قومي ايجنڊا تي فوڪس ڪرڻو پوندو.
وفاقي وزير خواجه آصف چيو ته سپريم ڪورٽ سڀ کان وڏو ادارو آهي، جڏهن قوم سامهون ٽي ٻه ۽ چار ٽي جو فيصلو هوندو ته پوءِ گوڙ ته ٿيندو، پارليامينٽ هجي يا عدليه اڪثريتي فيصلي کي اهميت هوندي آهي.
هن چيو ته سپريم ڪورٽ جو ادارو باوقار آهي، کين احترام آهي، هو سمجهي ٿو ته ادب، احترام، قانون ۽ آئين جي بلندي جو سلسلو هئڻ گهرجي.
