وڏي وزير سيد مراد علي شاهه چيو آهي ته معاشي ترقي وڌائڻ لاءِ 2047ع تائين انساني سيڙپڪاري يقيني بڻائڻي پوندي، پاڪستان ۾هيومن ڪيپٽيل انڊيڪس ٻڙي ڏهائي 41 آهي، جيڪا ملڪ جي ذيلي انساني ترقي جي نتيجن جي نشاندهي ڪري ٿي، ڪورونا وائرس ۽ ٻوڏ چئلينج وڌائي ڇڏيا.
پاڪستان هيومن ڪيپيٽل ريويو بابت تقريب کي خطاب ڪندي وڏي وزير چيو ته ڏکئي وقت ۾ سنڌ جي عوام جي مدد ڪندڙ ملڪن جو هو ٿورائتو آهي، جٽادار اقتصادي ترقي ۾ انساني سيڙپڪاري جي اهم ڪردار کي وڌيڪ بيان نه ٿو ڪري سگهجي.
هن چيو ته انساني سيڙپڪاري جا فائدا حاصل ڪرڻ ۾ وقت لڳندو آهي، ترت نتيجا ناهن ايندا، ايڇ سي آر عالمي بئنڪ جي وسيع هيومن ڪيپٽيل پراجڪيٽ جو حصو آهي، جنهن کي 2018ع ۾ شروع ڪيو ويو.
وڏي وزير چيو ته اسڪول کان ٻاهر ٻارن، غربت کي منهن ڏيڻ ۽ ليبر مارڪيٽ جي نتيجن جو تجزيو ڪرڻو پوندو، هيومن ڪيپيٽل ريويو جي رپورٽ مان وڏي ڄاڻ سامهون آئي آهي.
سيد مراد علي شاهه چيو ته پاڪستان جي آباديءَ ۾ اضافي جي شرح کي ڪنٽرول ڪري معاشي ترقي حاصل ڪري سگهجي ٿي، جي ڊي پي وڌائڻ لاءِ 2047ع تائين انساني سيڙپڪاري يقيني بڻائڻي پوندي.
وڏي وزير چيو ته ڪورونا ۽ ٻوڏ ڪجه ورهين ۾ ٿيل انساني سيڙپ جي فائدن تي پاڻي ڦيري ڇڏيون، پاڪستان ۾هيومن ڪيپٽيل انڊيڪس ٻڙي ڏهائي 41 آهي، جيڪا ملڪ جي ذيلي انساني ترقي جي نتيجن جي نشاندهي ڪري ٿي.
