پرڏيهي وزير بلاول ڀٽو زرداري آئين جي گولڊن جوبلي تي قوم کي مبارڪ ڏيندي چيو آهي ته ملڪي آئين قومي ٻڌي ۽ اتحاد جي ضمانت آهي، ڪجهه طاقتن کي برداشت ناهي ته عوام کي حق ملي سگهن، صوبا وسيلن جا مالڪ هجن، پاڻ کي قانون کان مٿڀرو سمجهندڙ سوچ آئين کي پنهنجو دشمن سمجهي ٿي، آئين ٺاهڻ ۽ بچائڻ لاءِ پ پ جي تاريخ بي مثال آهي.
آئين جي ڏهاڙي تي جاري ڪيل پنهنجي پيغام ۾ بلاول ڀٽو زرداري چيو ته 1973ع جو آئين سندن قومي حڪمت عملي ۽ وفاق جو زنجير آهي، 1973ع جو آئين پهرين چونڊيل وزيراعظم شهيد ذوالفقار علي ڀٽو جو قوم لاءِ تحفو ۽ امانت آهي.
سندس چوڻ هو ته هو آئين کي بڻائڻ ۾ پنهنجو ڪردار ادا ڪندڙ سڀني سياسي اڳواڻن کي سلام پيش ڪن ٿا، 14 آگسٽ 1947ع کانپوءِ قومي تاريخ جو ٻيو اهم ڏينهن 10 اپريل 1973ع آهي.
پرڏيهي وزير بلاول ڀٽو زرداري چيو ته پاڪستان هڪ وفاقي رياست آهي، تنهنڪري سندن آئين وفاقي آئين آهي، پاڪستان هڪ اسلامي ملڪ آهي، تنهنڪري آئين جو روح اسلامي تعليمات آهي.
هن چيو ته پاڪستان جمهوريت پسندن جو ملڪ آهي، تنهنڪري آئين جمهوري آئين آهي، ملڪي آئين قومي ٻڌي ۽ اتحاد جي ضمانت آهي، جڏهن کان آئين ٺاهيو ويو آهي ان تي حملا ٿيندا رهيا آهن.
سندس چوڻ هو ته ڪجهه طاقتن کي برداشت ناهي ته عوام کي حق ملي سگهن، صوبا وسيلن جا مالڪ هجن، اهي عنصر نٿا چاهن ته قانون جي سامهون سڀ برابر آهن.
پرڏيهي وزير بلاول ڀٽو زرداري چيو ته پاڻ کي قانون کان مٿڀرو سمجهندڙ سوچ آئين کي پنهنجو دشمن سمجهي ٿي، آئين ٺاهڻ ۽ بچائڻ لاءِ پ پ جي تاريخ بي مثال آهي.
سندس چوڻ هو ته شهيد محترمه بينظير ڀٽو ۽ صدر آصف علي زرداري آئين کي اصل شڪل ۾ بحال ڪيو.
پرڏيهي وزير بلاول ڀٽو زرداري چيو ته پاڪستان پيپلز پارٽي هميشه آئين تي عمل ڪرائڻ ۽ جمهوري نظام سان گڏ بيٺل آهي، پ پ آئين کي رانديڪو سمجھندڙ سوچ کي قطعي شڪست ڏيڻ لاءِ پرعزم آهي.
