ملڪ تي قرضن جو مجموعي بار 51 هزار 131 ارب رپيا ٿي ويو آهي، پرڏيهي قرض 86 ارب 51 ڪروڙ ڊالرن تائين پهچي ويا جنهن سبب هر پاڪستاني 2 لک 16 هزار 709 رپين جو قرضي ٿي ويو آهي.
ملڪ تي مقامي ۽ پرڏيهي قرضن جو بار ڪيترو آهي؟ تفصيل قومي اسيمبلي ۾ پيش ڪيا ويا.
ناڻي واري وزير قرضن واري پاليسي اسٽيٽمينٽ ۽ مالياتي پاليسي اسٽيٽمينٽ ايوان ۾ پيش ڪئي.
ناڻي واري وزير پاران پيش ڪيل دستاويزن موجب، سيپٽمبر 2022ع تائين ملڪ تي قرضن جو مجموعي بار 51 هزار 131 ارب رپيا ٿي ويو آهي جڏهن ته ملڪ تي مقامي قرضن جو بار وڌي31 هزار 402 ارب رپيا ٿي ويو آهي.
دستاويزن ۾ چيو ويو آهي ته پرڏيهي قرضن جو بار وڌي 86 ارب 51 ڪروڙ ڊالر ٿي ويو.
دستاويزن موجب، ملڪ جو هر شهري 2 لک 16 هزار 709 رپين جو قرضي ٿي ويو آهي.
دستاويزن ۾ چيو ويو آهي ته جون 2021ع ۾ هر شهري تي هڪ لک 79 هزار 93 رپين جو قرض هو جڏهن ته جون 2021ع کان جون 2022ع تائين ڊالر جي قيمت ۾ واڌ سان قرضن ۾ 3 هزار 764 ارب رپين جو اضافو ٿيو.
دستاويزن موجب، جون 2022 ۾ قرض جي ڊي پي جو 73 ڏهائي 5 سيڪڙو هو.
