وزيراعظم شهباز شريف چيو آهي ته ملڪ جي سمورن ادارن کي پنهنجي حدن ۾ رهي ڪم ڪرڻ گھرجي، ٽڪراءُ ملڪ جي مفاد ۾ نه آهي، ٻٽو معيار ڪنهن به معاشري لاءِ فائديمند ناهي هوندو، آئين ۽ قانون جي بالادستي جو سڀني کي احترام ڪرڻو پوندو.
لنڊن ۾ ميڊيا سان ڳالهائيندي وزيراعظم چيو ته ماضي ۾ مخالف ڌر کي ڪوڙن ڪيسن ۾ جيل موڪليو ويو، اڄ عدالت ۾ ڪيتريون ئي ضمانتون ٿي وينديون آهن، اهڙي ٻٽي معيار کي ڪير به نه مڃيندو، عدل انصاف ٿيندي نظر اچڻ گهرجي، ٻٽو معيار نٿا چاهين.
هن چيو ته سندس دعا آهي ته عدليه ۽ ٻيا ادارا گڏجي پاڪستان جي خدمت ڪن، ادارن وچ ۾ ٽڪراءُ ملڪ جي مفاد ۾ نه آهي، آئين ۾ ادارن جون حدون بيان ٿيل آهن، سمورن ادارن کي انهن حدن ۾ رهي ڪردار ادا ڪرڻو پوندو.
وزيراعظم وڌيڪ چيو ته آئين ۽ قانون جي بالادستي لاءِ هو ڪردار ادا ڪري رهيا آهن، پاڪستان کي جلد ڏکي صورتحال مان ڪڍندا، حڪومت چيلينجز کي منهن ڏيڻ لاءِ ڀرپور ڪوشش ڪري رهي آهي، انشاءَ الله جلد ملڪ ڏکين حالتن مان نڪري ايندو.
