اڳوڻي وزيراعظم شاهد خاقان عباسي چيو آهي ته ملڪ جي وڏي ضرورت آهي ته هر ادارو پنهنجي حدن ۾ رهي ڪم ڪري، قانون ٺاهڻ آئيني طور پارليامينٽ جو ڪم آهي، عدالتي سڌارن بابت بل پارليامينٽ منظور ڪري صدر کي اماڻي ڇڏيو، هن وقت هر ماڻهو سپريم ڪورٽ طرف ڏسي رهيو آهي، بل جي منظور يا رد ٿيڻ کان اڳ عدالت حڪمنامو جاري ڪري ڇڏيو، اڄ سڄو ملڪ پريشان آهي، ملڪي مسئلن طرف ڌيان ڏيڻو پوندو، ملڪ ۾ جيڪي مسئلا پيدا ٿي رهيا آهن انهن جو حل ويهي ڪري ڳولڻو پوندو.
ڪراچيءَ ۾ احتساب عدالت ٻاهران ميڊيا سان ڳالهائيندي شاهد خاقان عباسي چيو ته نيب ۾ پيش ٿيڻ کي چوٿون سال شروع ٿي ويو آهي، چيف جسٽس جي ذميواري آهي ته عدالتن مان انصاف ملي، پاڻمرادو نوٽيس ته ورتو ويندو آهي پر اهو ناهي ڏٺو ويندو ته عدالتن ۾ ڇا ٿي رهيو آهي.
سندس چوڻ هو ته اڄ روڊ تي هلندڙ ماڻهو به اهو ٻڌائي سگهي ٿو ته ڪهڙي ڪيس جو ڪهڙو فيصلو ايندو، آسان حل هو ته فل ڪورٽ جوڙي معاملي کي اڪلايو وڃي ها، صدر کي مهلت هئي ته هو صحي ڪري ها.
اڳوڻي وزيراعظم شاهد خاقان عباسي چيو ته قانون تي عدالتون تشريح ڪري سگهن ٿيون، قانون ٺاهڻ پارليامينٽ جو ڪم آهي، ملڪ جي وڏي ضرورت آهي ته هر ادارو پنهنجي حدن ۾ رهي ڪم ڪري، پاڻمرادو نوٽيس وٺڻ بعد اپيل جو حق به هوندو آهي ائين ناهي ڪيو ويو جڏهن مرضي جي بينچ ٺهندي ته ماڻهو تنقيد ته ڪندا.
هن چيو ته نظام ۾ ڪيتريون ئي خاميون آهن، هتي ماڻهو ڪيترن ئي سالن کان انصاف لاءِ عدالتن جا چڪر ڪاٽي رهيا آهن، هن وقت ملڪي حالتون تمام گهڻيون مشڪل ۾ آهن.
سندس چوڻ هو ته عدليا هر شيءِ جو نوٽيس وٺندي آهي پر سواءِ اهو ڏسڻ جي ته عدالتن ۾ ڇا ٿي رهيو آهي، هر ماڻهو جي نظر هن وقت سپريم ڪورٽ تي لڳل آهي، ملڪ جي ساک متاثر ٿي رهي آهي هو عدالتن جو احترام ڪندا آهن.
اڳوڻي وزيراعظم شاهد خاقان عباسي چيو ته اهڙو قانون جيڪو پارليامينٽ منظور ڪيو صدر صحي ناهي ڪئي، ملڪ ۾ ڏڦيڙ جي ڪيفيت هوندي ته ان جو اثر ملڪي معيشيت تي پوندو، موجوده چيف جسٽس پنهنجي ذميواري پوري ڪري رهيو آهي يا نه ان جو فيصلو تاريخ يا عوام ڪندو، دنيا ۾ ڪٿي ائين ناهي ٿيندو ته فيصلن تي اپيل نه ٿئي.
