وفاقي گهرو وزير راڻا ثناءَ الله چيو آهي ته ملڪ ۾ عام چونڊون هڪ ئي وقت ٿيڻ گهرجن، الڳ الڳ عام چونڊن سان ملڪ ڏڦيڙ ۽ بحران جو شڪار ٿي ويندو.
سپريم ڪورٽ ٻاهران ميڊيا سان ڳالهائيندي وفاقي گهرو وزير راڻا ثناءَ الله چيو ته عمران خان وڏي محنت ڪري سياسي بحران پيدا ڪيو آهي.
هن چيو ته عام چونڊن بابت ڪيس جو فيصلو فل ڪورٽ ڪرڻ گهرجي.
سندس چوڻ هو ته اميد آهي ته عام چونڊن بابت ڪيس جو فيصلو اهڙو نه ايندو جنهن سان بحران پيدا ٿي.
وفاقي گهرو وزير راڻا ثناءَ الله چيو ته چئن ججن پاڻمرادو نوٽيس خارج ڪيو اهڙي صورتحال ۾ فيصلو ايندو ته انصاف نه ٿيندو، آئين ۾ ايمرجنسي جو آپشن آهي.
هن چيو ته فل بئنچ جو مطالبو هر پاسي کان اچي رهيو آهي، پي ٽي آءِ به واضح ڪيو آهي ته فل بئنچ تي ڪو اعتراض ناهي، فل بئنچ جو مطالبو مڃڻ ۾ ڪهڙو عيب آهي.
سندس چوڻ هو ته سموري قوم کي چيف جسٽس مان انصاف جون اميدون آهن.
وفاقي گهرو وزير راڻا ثناءَ الله چيو ته هڪ فتني وڏي محنت ڪري ملڪ ۾ بحران پيدا ڪيو آهي، آءِ ايم ايف سان معاهدا هنن نه ڪيا آهن.
قانون واري وفاقي وزير اعظم نذير تارڙ چيو ته جمهوريت ئي ملڪي مسئلن جو حل آهي ۽ جمهوريت ئي سڀني کي متحد رکندي.
هن چيو ته سمورن آئيني ادارن کي پنهنجو ڪردار ادا ڪرڻ گهرجي، ادارا ڪنهن هڪ شخص جي حڪم جي ماتحت نه هوندا آهن.
