پ پ سنڌ جي صدر ۽ سينيٽر نثار کهڙي چيو آهي ته ملڪ ۾ قومي ۽ صوبائي اسيمبلين جون چونڊون هڪ ئي ڏينهن تي ڪرائڻ کانسواءِ ٻيو ڪو به فيصلو قبول ناهي، جيڪڏهن هڪ ڏينهن تي چونڊون نه ڪرايون ويون ۽ ٻيو فيصلو ڪيو ويو ته سنڌ سراپا احتجاج بڻجي ويندي.
لاڙڪاڻو پريس ڪلب ۾ هنگامي پريس ڪانفرنس ڪندي نثار کهڙي چيو ته پاڻمرادو نوٽيس واري ڪيس ۾ سپريم ڪورٽ گنجائش جي ڳالهه ڪري رهي آهي ته سڀ پارٽيون گڏ ويهي صلاح مشورا ڪن ته پوءِ ملڪ ۾ هڪ ئي ڏينهن چونڊون ڪرائڻ لاءِ به گنجائش ڪڍي سگهجي ٿي تنهن ڪري ان معاملي تي فل ڪورٽ ٺاهي وڃي ۽ 14 مئي واري فيصلي تي نظرثاني ڪئي وڃي.
هن چيو ته پنجاب ۽ ڪي پي ڪي اسيمبليون بحال ڪيون وڃن جنهن کان پوءِ ملڪ ۾ نگران حڪومتون ٺاهي هڪ ڏينهن تي عام چونڊون ڪرايون وڃن.
سندس چوڻ هو تهجيڪڏهن عدالت کي پنهنجي غلط فيصلي تي فيس سيونگ ڪرڻي آهي ته پوءِ ڪنهن هڪ شخص سان اتفاق راءِ جو ماحول ٺاهڻ بجاءِ فل ڪورٽ ٺاهي وڃي ۽ سياسي نظام کي نقصان نه پهچايو وڃي.
نثار کهڙي چيو ته اليڪشن ڪرائڻ اليڪشن ڪميشن جو اختيار آهي ۽ عدالت پاڻمرادو نوٽيس ڪيس ۾ اليڪشن ايڪٽ جي 69 واري آرٽيڪل جو به جائزو نه ورتو.
سندس چوڻ هو ته اسيمبليون تڏهن ئي ٽوڙي سگهجن ٿيون جڏهن امن امان جي صورتحال خراب هجي، معيشت بهتر نه هجي ۽ وڏي وزير تي ميمبرن تي اعتماد نه هجي پر پنجاب ۾ وڏي وزير اعتماد جو ووٽ وٺڻ کان پوءِ ڪنهن هڪ شخص جي ضد ۽ بحراني صورتحال پيدا ڪرڻ لاءِ پنجاب اسيمبلي ٽوڙي عوام ۽ عوامي نمائندن جي توهين ڪئي وئي.
نثار کهڙي چيو ته جيڪڏهن چيف جسٽس بلاول ڀٽو زرداري جي تعريف ڪري رهيو آهي ته ٻئي ڪنهن غلط سوچ جي به مذمت ڪري، جيڪڏهن سياسي پارٽيون گڏ ويهي به وڃن ته اصل مسئلو اِهو آهي ته پاڪستان ۾ الڳ الڳ چونڊون نه ٿيڻ گهرجن، الڳ چونڊون ٿيڻ سان اليڪشن جي شفافيت برقرار نه رهندي.
