ملڪ ۾ هڪ ئي ڏينهن عام چونڊن بابت ڪيس ۾ وفاقي حڪومتي اتحاد، تحريڪ انصاف سان ڳالهين بابت رپورٽ سپريم ڪورٽ ۾ جمع ڪرائي ڇڏي، حڪومتي رپورٽ ۾ چيو ويو آهي ته حڪومت ۽ پي ٽي آءِ ۾ چونڊون هڪ ڏينهن ڪرائڻ تي اتفاق ٿي چڪو آهي، اهو طئي ناهي ٿيو ته قومي، سنڌ ۽ بلوچستان اسيمبليون ڪڏهن ٽوڙيون وينديون.
سپريم ڪورٽ ۾ جواب حڪومتي ڳالهين واري ڪميٽي جي سربراهه ناڻي واري وفاقي وزير اسحاق ڊار، اٽارني جنرل ذريعي سپريم ڪورٽ ۾ جمع ڪرايو.
حڪومتي اتحاد طرفان جمع ڪرايل رپورٽ ۾ چيو ويو آهي ته حڪومت ۽ تحريڪ انصاف ۾ سڄي ملڪ ۾ چونڊون هڪ ڏينهن ڪرائڻ تي اتفاق ٿي چڪو آهي، ملڪ جي بهترين مفاد ۾ ڳالهين جو عمل بحال ڪرڻ لاءِ تيار آهن.
حڪومتي اتحاد طرفان جمع ڪرايل رپورٽ موجب، تحريڪ انصاف سڄي ملڪ ۾ هڪ ئي تاريخ تي اليڪشن ڪرائڻ تي اتفاق ڪيو، چونڊن جي معاملي تي ڌرين ۾ ڳالهين ۾ هاڪاري اڳڀرائي ٿي آهي.
حڪومتي اتحاد طرفان جمع ڪرايل رپورٽ ۾ چيو ويو آهي ته اهو طئي ناهي ٿيو ته قومي، سنڌ ۽ بلوچستان اسيمبليون ڪڏهن ٽوڙيون وينديون.
