ميرپورخاص: يوٽيلٽي اسٽورن ۾ ڪروڙين رپين جي ڪرپشن ۾ ملوث 9 جوابدار گرفتار

ميرپورخاص ۾ ايف آءِ اي ڪارروائي دوران يوٽيلٽي اسٽورن ۾ ڪروڙين رپين جي ڪرپشن ۾ ملوث 9 جوابدارن کي گرفتار ڪري ورتو آهي. ايف آءِ اي حيدرآباد زون جي ڊائريڪٽر عبدالحميد ڀٽو جي هدايت تي ڪرپشن ۾ ملوث ماڻهن خلاف ڪريڪ ڊائون جو سلسلو جاري آهي. ايف آئي اي ڊپٽي ڊائريڪٽر ڪمپوزٽ سرڪل ميرپورخاص محمد رشيد ڀٽي جي نگراني ۾ ايف آءِ اي ٽيم ڇاپو هڻي ڪرپشن ۾ ملوث يوٽيلٽي اسٽور جي 9 اهلڪارن کي گرفتار ڪري ورتو. گرفتار جوابدارن ۾ مشتاق لاشاري، غلام علي لاشاري، مٺو خان، حبدار علي، فيض محمد، ڀنڀرو مل، امير بخش ۽ ٻيا شامل آهن. ايف آءِ اي طرفان گرفتار جوابدارن خلاف ڪيس داخل ڪيو ويو آهي. ايف آءِ اي ترجمان موجب، ايف آءِ اي حيدرآباد زون جي ڊائريڪٽر جي هدايت تي ڪاروائي ڪئي آهي، گرفتار ڪيل جوابدار رعايتي شين ۾ ڪرپشن ۾ ملوث هئا. ايف آءِ اي ترجمان جو چوڻ آهي ته جوابدار رعايتي شين کي عام ماڻهن بدران مارڪيٽ ۾ وڪرو ڪندا هئا، جوابدارن جي ڪرپشن سبب ملڪي خزاني کي 60  لک کان وڌيڪ جو نقصان ٿيو آهي. ايف آءِ اي ترجمان موجب، گرفتار جوابدار يوٽيلٽي اسٽور ڪارپوريشن ميرپورخاص ريجن ۾ سيلزمين ۽ اسسٽنٽ سيلزمين مقرر هئا، گرفتار جوابدارن کان جاچ شروع ڪئي وئي آهي جڏهن ته ٻين جوابدارن جي گرفتاري لاءِ ڇاپا هنيا پيا وڃن.