سنڌ هاءِ ڪورٽ سرڪٽ بينچ لاڙڪاڻي ميهڙ واقعي ڪيس ۾ درخواستن جي انگ ۾ اضافي سبب ٻڌڻي 8 مئي تائين ملتوي ڪري ڇڏي آهي.
سنڌ هاءِ ڪورٽ سرڪٽ بينچ لاڙڪاڻي ۾ ميهڙ واقعي ڪيس ۾ نامزد ايم پي اي سردار خان چانڊيو ۽ سندس ڀاءُ برهان خان چانڊيو سميت ٻين جوابدارن طرفان داخل درخواستن جي ٻڌڻي ٿي.
ٻڌڻي دوران ام رباب چانڊيو، سندس وڪيل صلاح الدين پنهور ۽ جوابدارن جا وڪيل عدالت ۾ پيش ٿيا.
عدالت درخواستن جي انگ ۾ اضافي سبب ٻڌڻي 8 جي مئي تائين ملتوي ڪري ڇڏي.
ان موقعي تي ميڊيا سان ڳالهائيندي ام رباب چانڊيو چيو ته گذريل ٻڌڻي تي ڪيس شاهه صاحب جج ڏانهن منتقل ٿيو هو جنهن اڳ سندن ڪيس ٻڌو هو پر بدقسمتي سان اڄ ڪيس ۾ ڪا به اڳڀرائي نه ٿي سگهي ڇاڪاڻ جوابدارن جون 4 کان 5 درخواستون گڏ هيون.
هن چيو ته هڪ ئي ڏينهن سڀ درخواستون ٻڌي فيصلو ڏئي نٿو سگهجي ۽ ان سان ڪورٽن تي بار به هوندو آهي هي سڀ دير ڪرڻ جا طريقا آهن جڏهن ته ٽرائل هلي رهيو آهي.
سندس چوڻ هو ته بزدل سردار ھائي ڪورٽ ۾ قسم نامو ڏئي آيا آهن ته هو ٽرائل هلائيندا ته پوءِ درخواستون گڏ ڪرائڻ ڪورٽ ۽ سندن وقت ضايع ڪرڻ آهي.
ام رباب چانڊيو چيو ته ڇهن ورهين کان ڪيس مڪمل ٿي نه سگهيو آهي، سردار نٿا چاهين ته ڪيس هلي ۽ ڪا اڳڀرائي ٿئي، اڄ هائي ڪورٽ الڳ الڳ تاريخون رکيون، عدالت کي اپيل ڪئي آهي ته ڪيس هلائي فيصلو ڏنو وڃي….
