لاڙڪاڻي جي نادرا سينٽر ۾ هڪ شهري ۽ نادرا عملي وچ ۾ ٿيل منهن ماري واري وڊيو وائرل ٿي وئي آهي.
لهر ڪالوني واري علائقي ۾ قائم نادرا سينٽر ۾ ڪارڊ ٺهرائڻ لاءِ آيل شهري محمد حسن ابڙي جي مبينا طور نادرا عملي سان منهن ماري ٿي پئي.
شهري محمد حسن ابڙي ۽ نادر عملي جي منهن ماري واري وڊيو سوشل ميڊيا تي وائرل آهي.
رابطي ڪرڻ تي نادرا سينٽر جي انچارج عبدالله ڀٽو ٻڌايو ته هڪ شهري اچي زبردستي ڪارڊ ٺهرائڻ لاءِ دٻاءُ وڌو، انڪار تي ڀڃ ڊاهه ڪئي.
الزام هيٺ شهري محمد حسن ابڙي حد جي حيدري ٿاڻي تي پهچي نادرا سينٽر جي عملي خلاف اين سي داخل ڪرائيندي موقف اختيار ڪيو ته نادرا سينٽر جي عملي بدتميزي ڪري ڌڪا ڏنا .
شهري محمد حسن ابڙي مطالبو ڪيو ته واقعي جي جاچ ڪري نادرا عملي خلاف ڪارروائي ڪئي وڃي.
پوليس موجب، نادرا سينٽر جي عملي طرفان ڪنهن به قسم جي اين سي يا شڪايت ٿاڻي تي داخل نه ڪرائي وئي آهي ۽ نه ئي سرڪاري طور تي ڪو ليٽر مليو آهي. پوليس جو چوڻ هو ته شهري محمد حسن ابڙي نادرا سينٽر جي عملي خلاف اين سي داخل ڪرائي آهي، معاملي جي جاچ ڪئي پئي وڃي.
