صوبائي وزير ناصر شاهه چيو آهي ته بند گهٽ ۾ اچڻ کانپوءِ تحريڪ انصاف پنهنجي شرطن تي حڪومت سان ڳالهيون ڪرڻ چاهي ٿي، اسد قيصر چونڊ سڌارن بابت ڳالهين لاءِ قومي اسيمبلي ٽوڙڻ جو شرط رکيو آهي، قومي اسيمبلي ٽٽي وئي ته ڇا سڌارا عمران نيازي منظور ڪندو؟.
عمران نيازي جي سياست بابت جاري ڪيل بيان ۾ ناصر شاهه چيو ته فواد چوڌري چوي ٿو ته حڪومت سان ڳالهيون تڏهن ٿينديون جڏهن اسٽيبلشمينٽ به گڏ ويهندي.
سندس چوڻ هو ته پي ٽي آءِ جو اصل مقصد اسٽيبلشمينٽ سان گڏ ويهي ٻيهر سليڪٽيڊ ٿيڻ جي ڪوشش آهي.
صوبائي وزير ناصر شاهه چيو ته عمران نيازي پارلياماني نظام جو مخالف ۽ صدارتي نظام چاهي ٿو ته جيئن ڪنهن کي جوابده نه هجي، جارج آرويل جي ناول ” نائينٽين ايٽي فور“ کان متاثر ٿي عمران نيازي ” بگ برادر“ بڻجي عوام کان سوال ڪرڻ جو حق کسڻ چاهي ٿو.
هن چيو ته عمران نيازي اقتدار ۾ واپس اچي جاسوسي جو اهڙو نظام آڻڻ چاهي ٿو ته جيئن هر شخص جي زندگي کي ڪنٽرول ڪري سگهجي.
صوبائي وزير ناصر شاهه چيو ته نيازي جهڙا وڏا بيمار ذهن حڪمران هن خطي تي مڙهيا ويا پر اڄ هو تاريخ ۾ دفن آهن.
