القادر ٽرسٽ ڪيس ۾ نيب هٿان گرفتار پي ٽي آءِ چيئرمين کي اڄ رمانڊ لاءِ احتساب عدالت ۾ پيش ڪيو ويندو.
رپورٽن مطابق عمران خان خلاف ڪيس جي ٻڌڻي اڄ اسلام آباد پوليس لائن گيسٽ هائوس ۾ ٿيندي، نيو گيسٽ هائوس پوليس لائن کي هڪ ڀيري لاءِ عدالت جو درجو ڏنو ويو آهي، جنهن جو نوٽيفڪيشن جاري ڪيو ويو.
توشه خانه ڪيس ۾ عمران خان تي اڄ فرد جرم لاڳو ڪيو ويندو، کيس احتساب عدالت جي جج آڏو به پيش ڪيو ويندو.
ان کان اڳ عمران خان کي ايف 8، ڪورٽ ڪمپليڪس اسلام آباد ۽ جڊيشل ڪمپليڪس جي 114 اسلام آباد ۾ پيش ٿيڻو هو.
ٻئي طرف ذريعن دعويٰ ڪئي آهي ته پي ٽي آءِ چيئرمين کي پوليس لائين گيسٽ هائوس منتقل ڪيو ويو آهي ۽ نيب جي درخواست تي وفاقي حڪومت طرفان جسماني رمانڊ جي صورت ۾ پوليس لائين گيسٽ هائوس کي سب جيل جو درجو ڏنو ويو آهي، عمران خان کي اتي رکيو ويندو.
ذريعن موجب، ڊپٽي ڊائريڪٽر نيب ميان عمر جي سربراهي ۾ 3 رڪني ٽيم عمران خان کان جاچ ڪندي.
واضح رهي ته پاڪستان تحريڪ انصاف جو چيئرمين اڳوڻي وزيراعظم عمران خان گذريل ڏينهن اسلام آباد هاءِ ڪورٽ پهچي ويو هو، جنهن کي نيب القادر ٽرسٽ ڪيس ۾ گرفتار ڪيو هو.
