پ پ چيئرمين ۽ پرڏيهي وزير بلاول ڀٽو زرداري چيو آهي ته هن وقت سندن سياست جو محور معاشري مان ورهاست جو خاتمو، معيشت جي بحالي، دنيا ۾ پاڪستان جي سربلندي ۽ عوام کي رليف ڏيارڻ آهي.
بلاول هائوس ڪراچي ۾ پ پ چيئرمين بلاول ڀٽو زرداري جي صدارت هيٺ سنڌ جي پنجن ڊويزنن جي چونڊيل ميمبرن، ڊويزنل ۽ ضلعي عهديدارن جو اجلاس ٿيو.
اجلاس ۾ پ پ ليڊنگ ونگ جي مرڪزي صدر فاريال ٽالپر، وڏي وزير مراد علي شاهه، سينٽر نثار کهڙي، سينيٽر وقار مهدي، عاجز ڌامراهه ۽ نعمان شيخ سميت حيدرآباد، سکر، لاڙڪاڻي، شهيد بينظير آباد ۽ ميرپورخاص ڊويزنن جي چونڊيل نمائندن ۽ عهديدارن شرڪت ڪئي.
ميمبرن ۽ عهديدارن طرفان پارتي چيئرمين کي مڪاني چونڊن ۾ ڪاميابي تي واڌايون ڏيندي مٿس مڪمل اعتماد جو اظهار ڪيو.
اجلاس ۾ ڳالهائيندي پ پ چيئرمين بلاول ڀٽو زرداري چيو ته سندس تڪ ۽ علائقي جي جمهوريت پسند عوام کي واڌايون ۽ جيالن کي شاباس جو پيغام پهچايو وڃي، مڪاني چونڊن ۾ ڪاميابي بعد عوام کي سهولتون پهچائڻ سندن مشن آهي.
بلاول ڀٽو زرداري چيو ته جيالن ان جذبي سان گڏجي عوام سان ڪم ڪيو ته ايندڙ اليڪشن ۾ اڃا وڏي مارجن تان ڪاميابي يقيني آهي.
پرڏيهي وزير بلاول ڀٽو زرداري چيو ته موجوده حالتن پاڪستان پيپلزپارٽي کي اڳڀرائي ۽ ڪاميابي جو تاريخي موقعو ڏنو آهي، سندن سياست جو محور معاشري مان ورهاست جو خاتمو، معيشت جي بحالي، دنيا ۾ پاڪستان جي سربلندي ۽ عوام کي رليف ڏيارڻ آهي.
