سنڌي ادبي بورڊ جي چيئرمين مخدوم سعيد الزمان ’عاطف‘ چيو آهي ته سنڌي ادبي بورڊ هڪ قومي ادارو آهي جنهن کي ترقي وٺرائڻ لاءِ سنڌ جي ڏاهن ۽ گهڻ گهرن کي گڏجي ڪوشش ڪرڻ گهرجي، بورڊ پاران سنڌ جي اديبن، ليکڪن، ڏاهن ۽ دانشورن کي عالمي مڃتا ڏيارڻ لاءِ سندن انگريزي ۾ پروفائل ٺاهڻ جو سلسلو شروع ڪيو ويو آهي، سنڌ جي تاريخي ماڳن موهن جو دڙو، معصوم شاهه جو منارو، رني ڪوٽ، ڀٽائي رحه ۽ ٻين جا پڻ جا يادگار جوڙايا ويندا.
سنڌي ادبي بورڊ جي چيئرمين مخدوم سعيد الزمان ’عاطف‘ سان مختلف ادارن جي سربراهن ۽ اديبن ملاقاتون ڪيون آهن.
مخدوم سعيد الزمان سان سنڌي ڊپارٽمينٽ جي پروفيسر ڊاڪٽر مخمور بخاري، اڳوڻي براڊ ڪاسٽر نصير مرزا، حيدرآباد ريڊيو جي اسٽيشن ڊائريڪٽر علي اڪبر هڱورجو، مرزا قليچ بيگ چيئر جي ڊائريڪٽر نواب ڪاڪا، مهراڻ يونيورسٽي جي پروفيسر ڪمليش ولڀ، سنڌ يونيورسٽي جي پروفيسر ڊاڪٽر شجاع مهيسر، ڊاڪٽر آصف ميمڻ ۽ ميڊم قزبانو آصف ملاقات ڪئي.
ملاقات ۾ ادب جي حوالي سان مختلف معاملن تي خيالن جي ڏي وٺ ڪئي.
آيل وفد سنڌي ادبي بورڊ جي چيئرمين مخدوم سعيد الزمان ’عاطف‘ پاران ڪرايل ادبي ڪمن جي ساراهه ڪئي.
انهيءَ موقعي تي سنڌي ادبي بورڊ جي چيئرمين مخدوم سعيد الزمان ’عاطف‘ چيو ته سنڌي ادبي بورڊ هڪ قومي ادارو آهي جنهن کي ترقي وٺرائڻ لاءِ سنڌ جي ڏاهن ۽ گهڻ گهرن کي گڏجي ڪوشش ڪرڻ گهرجي.
سندس چوڻ هو ته سنڌي ادبي بورڊ پاران سنڌ جي اديبن، ليکڪن، ڏاهن ۽ دانشورن کي عالمي مڃتا ڏيارڻ لاءِ سندن انگريزي ۾ پروفائيل ٺاهڻ جو سلسلو شروع ڪيو ويو آهي.
سنڌي ادبي بورڊ جي چيئرمين چيو ته سنڌ جي تاريخي ماڳن موهن جو دڙو، معصوم شاهه جي مناري، رني ڪوٽ، ڀٽائي رحه ۽ ٻين جا جا يادگار پڻ جوڙايا ويندا.
هن چيو ته سنڌي ادبي بورڊ سنڌ جي عالمن، اديبن، ڏاهن ۽ دانشورن طرفان سرجيل ادب کي نه رڳو سنڌ سطح پر عالمي سطح تي مڃتا ڏيارڻ لاءِ ڪوششون ڪري رهيو آهي ان سلسلي ۾ مختلف رٿائون جوڙي رهيا آهن ته جيئن دنيا به سندن ادب کان روشناس ٿي سگهي.
سنڌي ادبي بورڊ جي چيئرمين مخدوم سعيد الزمان ’عاطف‘ چيو ته اڄ تائين رڳو اها مشق ڪئي وئي آهي ته ٻاهرين ادب کي سنڌيءَ ۾ ترجمو ڪري شايع ڪرايو ٿو وڃي پر هو چاهن ٿا ته سنڌ جي اديبن جي علمي ۽ قلمي پورهئي کي انگريزي ۽ ٻين ٻولين ۾ ترجمو ڪرائي پوري دنيا ۾ پکيڙيو وڃي ته جيئن دنيا به سندن شاهوڪار ادب کان روشناس ٿي سگهي.
نامياري اديب ۽ محقق ڊاڪٽر مخمور بخاري چيو ته سنڌي ادبي بورڊ جون ادب جي واڌ ويجهه لاءِ ڪيل ڪوششون ساراهه جوڳيون رهيون آهن، هن ادب جي واڌاري لاءِ تمام گهڻيون ڪوششون ڪيون آهن، خاص طور تي ڪتابن جي ڇپائي ۽ ادبي رسالن جو وقتائتو اچڻ هميشه مڃتا ماڻڻ وارو عمل رهيو آهي.
اڳوڻي براڊ ڪاسٽر نصير مرزا چيو ته سنڌي ادبي بورڊ هڪ پراڻو ادارو آهي پر مخدوم سعيد الزمان ”عاطف“ جي اچڻ کانپوءِ 2019ع کان 2023ع تائين بورڊ تمام گهڻي ترقي ڪئي آهي.
