ورلڊ ڪپ 2023ع جو شيڊول جاري ٿي ويو آھي، ايونٽ جي شروعات پنج آڪٽوبر تي دفاعي چيمپئن انگلينڊ ۽ فائنلسٽ نيوزيلينڊ وچ ۾ ميچ سان ٿيندي.
ڀارتي ميڊيا جي رپورٽس موجب ورلڊ ڪپ ۾ 10 ٽيمن وچ ۾ 48 ميچون کيڏيون وينديون، ڀارت پھرين ميچ آسٽريليا خلاف 8 آڪٽوبر تي چنئي ۾ ٿيندي، پاڪستان پنھنجي پھرين ميچ 13 آڪٽوبر تي ڪواليفائنگ ٽيم جي خلاف کيڏندو.
ميگا ايونٽ جو سڀ کان وڏو مقابلو پاڪ ڀارت ڪرڪيٽ ٽيمن ۾ 15آڪٽوبر تي آچر ڏھاڙي نريندر مودي ڪرڪيٽ اسٽيڊيم احمد آباد ۾ ٿيندو.
ڀارتي ميڊيا دعويٰ ڪئي آھي تھ پاڪستاني ٽيم ورلڊ ڪپ کيڏڻ ڀارت ايندي، پاڪستاني ٽيم پنھنجون گروپ ميچون حيدرآباد، چنئي ۽ بينگلورو ۾ کيڏڻ چاھي ٿي.
ايونٽ جو فائنل 19 نومبر تي نريندر مودي ڪرڪيٽ اسٽيڊيم احمد آباد ۾ کيڏيو ويندو.
ميگا ايونٽ ۾ 10ٽيمون حصو وٺنديون، ميزبان ڀارت، پاڪستان، انگلينڊ، آسٽريليا، ڏکڻ آفريڪا، بنگلاديش، افغانستان ۽ نيوزيلينڊ جون 8 ٽيمون سڌي ريت ٽورنامينٽ جي لاءِ ڪواليفاءِ ڪري ورتو آھي.
ورلڊ ڪپ ڪواليفائنگ رائونڊ جا مقابلا ھلندڙ سال جون ۾ ميزبان زمبابوي، ويسٽ انڊيز، سريلنڪا، نيڌرلينڊ، اسڪاٽ لينڊ، عمان، نيپال، امريڪا، يو اي اي ۽ آئرلينڊ جي ٽيمن وچ ۾ ٿيندا.
