وزيراعظم شهباز شريف برطانيا جي راڄڌاني لنڊن ۾ ڪامن ويلٿ جي اڳواڻن جي اجلاس ۾ شرڪت ڪئي ۽ ان موقعي تي هن بادشاهه چارلس ۽ برطانوي هم منصب رشي سونڪ سان ملاقات ڪئي.
سماجي رابطن واري ويب سائيٽ ٽوئيٽر تي پنهنجي پيغام ۾ سڌ سماءَ واري وفاقي وزير مريم اورنگزيب، وزيراعظم جون بادشاهه چارلس سان گڏ تصويرون شيئر ڪندي چيو ته شهباز شريف لنڊن ۾ ڪامن ويلٿ اڳواڻن جي تقريب ۾ شرڪت ڪئي ۽ بادشاهه چارلس سان ملاقات ڪئي.
سندس چوڻ هو ته وزيراعظم شهباز شريف پاڪستان جي عوام طرفان بادشاهه چارلس کي تاج پوشي تي مبارڪون ڏنيون.
سڌ سماءَ واري وفاقي وزير مريم اورنگزيب چيو ته وزيراعظم شهباز شريف بادشاهه چارلس کي پاڪستان جي دوري جي دعوت به ڏني جڏهن ته بادشاهه چارلس وزيراعظم سان ڳالهه ٻولهه ۾ پنهنجي گذريل پاڪستان جي دوري کي ياد ڪيو.
ڪامن ويلٿ اڳواڻن جي اجلاس کي خطاب ڪندي وزيراعظم شهباز شريف چيو ته برطانوي بادشاهه چارلس جي تاجپوشي هڪ نئين دور جي شروعات آهي، دولت مشترڪه جي تنظيم کي مضبوط ڪرڻ لاءِ سڀني کي پنهنجو ڪردار ادا ڪرڻ گهرجي.
سندس چوڻ هو ته دولت مشترڪه جي ملڪن وچ ۾ گڏيل سهڪار ۾ وڌيڪ بهتري آڻڻ جي ضرورت آهي، پاڪستاني نوجوانن ۽ هنر مند ماڻهن کي بهترين موقعا فراهم ڪرڻ لاءِ پنهنجي حڪومت جي عزم جو به ذڪر ڪيو.
سڌ سماءَ واري وفاقي وزير مريم اورنگزيب چيو ته پاڪستان ۾ حڪومت عورتن ۽ نوجوانن کي بااختيار بڻائي رهي آهي، حڪومت پٺتي پيل طبقن، اقليتن، معذورن ۽ ٽرانس جينڊر ڪميونٽي کي قومي ڌارا ۾ آڻي رهي آهي.
وزيراعظم شهباز شريف، برطانوي هم منصب رشي سونڪ سان ملاقات ڪئي ۽ برطانوي بادشاهه چارلس جي ٻن ڏينهن واري تاجپوشي تقريب جي شاندار انتظامن تي کيس مبارڪ ڏني.
ملاقات ۾ وزيراعظم شهباز شريف گذريل سال پاڪستان ۾ آيل تباهي واري ٻوڏ جي حوالي سان برطانيا طرفان مدد کي ساراهيو.
وزيراعظم چيو ته ٻنهي ملڪن کي مختلف شعبن ۾ ٻه طرفا لاڳاپا وڌائڻ جي ضرورت آهي، جنهن تي هن گڏيل ڪميشن قائم ڪرڻ جي تجويز ڏني.
ان موقعي تي برطانوي وزيراعظم رشي سونڪ به ٻطرفي لاڳاپن کي هٿي وٺرائڻ ۾ دلچسپي جو اظهار ڪيو.
