حڪومت پاران پنجاب جي چونڊن بابت سپريم ڪورٽ جي فيصلي خلاف اڄ پارليامينٽ ۾ هڪ وڌيڪ ٺهراءَ پيش ڪرڻ جو فيصلو ڪيو آهي، وزيراعظم شهباز شريف جو چوڻ آهي ته ٽي رڪني بئنچ جو فيصلو آيو، اهڙو خطرناڪ منظر اڳ ڪڏهن به ناهي ڏٺو، سپريم ڪورٽ جي ٽه رڪني بينچ جي فيصلي تحت 10 اپريل تائين اليڪشن ڪميشن کي فنڊ ڏيڻا آهن، جسٽس قاضي فائز عيسيٰ جي فيصلي کي سرڪلر ذريعي ختم ڪيو ويو، ڪهڙي ريت ٽي چار جي فيصلي کي رد ڪيو ويو.
وزيراعظم شهبازشريف جي صدارت هيٺ سياسي اڳواڻن جو اهم اجلاس ٿيو، جنهن ۾ مولانا فضل الرحمان، آصف علي زرداري، مريم نواز سميت اتحادي پارٽين جي اڳواڻ شرڪت ڪئي، جڏهن ته نوازشريف وڊيو لنڪ ذريعي شريڪ ٿيو.
اجلاس ۾ ملڪ جي سياسي صورتحال تي تفصيلي غور ڪيو ويو، قانوني ٽيم طرفان عدالتي فيصلي بابت بريفنگ ڏيندي مختلف آئيني ۽ قانوني آپشن آڏو رکيا.
قانوني ٽيم عدالتي حڪم کي عمل نه ٿيڻ جوڳو قرار ڏنو.
اجلاس کانپوءِ خطاب ڪندي وزيراعظم چيو ته عدالت ۾ چار، ٽي جي فيصلي کي نظرانداز ڪيو ويو، هڪ ٺهراءُ اڳ آندو ويو، هڪ ٺهراءُ پارليامينٽ ۾ پيش ڪيو ويندو.
هن چيو ته سپريم ڪورٽ سياسي پارٽين جي درخواست رد ڪري ڇڏي، ٽي رڪني بئنچ جي فيصلي موجب حڪومت کي فنڊ فراهم ڪرڻا آهن.
شهبازشريف چيو ته اليڪشن ڪميشن کي يارهن تاريخ تي فنڊن بابت سپريم ڪورٽ ۾ رپورٽ پيش ڪرڻي آهي، 17 اپريل کان تائين پنجاب حڪومت کي سڪيورٽي فراهم ڪرڻي آهي.
وزيراعظم چيو ته ڪابينا اجلاس ۾ به تفصيلي ڳالهه ٻولهه ٿي، صلاح مشوري بعد پختا فيصلا ڪيا ويندا.
شهبازشريف چيو ته قوم کي خبر هجڻ گهرجي ته آئين ۽ قانون سان مذاق ڪيو پيو وڃي، اهڙا خطرناڪ منظر ڪڏهن ناهن ڏٺا.
