سنڌ جي وڏي وزير مراد علي شاهه سان وفاقي وزير شاهزين بگٽيءَ جي پنهنجي وفد سان گڏ ملاقات ٿي آهي جنهن ۾ ٻنهي صوبن ۾ منشيات جي خاتمي جي حوالي سان کنيل قدمن ۽ آپريشن بابت ڳالهيون ڪيون ويون.
ملاقات ۾ وڏي وزير سان گڏ صوبائي وزير سردار شاهه، مڪيش ڪمار چاولا ۽ ٻيا شريڪ ٿيا.
اجلاس ۾ اتفاق ڪيو ويو ته ڊرگ مافيا گڏجي ڪم ڪيو ويندو.
ڊرگ مافيا خلاف وفاقي ۽ صوبائي ايجنسيز رابطي سان آپريشن جاري رکنديون،
تعليمي ادارن کي هر صورت ۾ منشيات کان پاڪ ڪيو ويندو، منشيات جي عادي ماڻهن جي بحالي لاءِ صوبائي حڪومت کانسواءِ وفاقي حڪومت به وڌيڪ ادارا قائم ڪندي.
ان موقعي تي وڏي وزير مراد علي شاهه وفد کي آگاهي ڏيندي چيو ته منشيات جي خاتمي لاءِ سندس سربراهيءَ ۾ ٽاسڪ فورس ٺاهي وئي آهي، چيف سيڪريٽري نارڪو ٽيڪس ڪنٽرول ڪميٽي چيئر ڪندو آهي.
وڏي وزير چيو ته ڊي جي رينجرز بارڊر ۽ سائيٽ ڪميٽي جو سربراهه آهي جڏهن ته آءِ جي سنڌ شهرن ۽ ٽائون جي ڪميٽين کي ڏسندو آهي.
سنڌ جي وڏي وزير مراد علي شاهه چيو ته بارڊر تي وڌيڪ سختي ڪئي وڃي ته جيئن منشيات ملڪ ۾ داخل نه ٿي سگهي.
صوبائي وزير مڪيش ڪمار چاولا چيو ته ايڪسائيز پوليس جون صوبي ۾ 46 فيلڊ آپريشن ڪميٽيون ڪم ڪنديون آهن، گذريل چئن ورهين کان صوبي ۾ نارڪو ٽيڪس جا 509 ڪيس ٻڌڻي هيٺ آهن، 370 ڪيسن جا عدالتن فيصلا ٻڌائي ڇڏيا آهن.
وڏي وزير مراد علي شاهه چيو ته ڪراچيءَ ۾ نشي جي عادي ماڻهن جي بحالي لاءِ 60 بسترن جي اسپتال، حيدرآباد ۽ سکر ۾ 45 بسترن جي اسپتال آهي، ڊاڪٽرن نشي جي عادي ماڻهن جي پنج بيجز کي تربيت ڏني آهي.
وفاقي وزير شاهزين بگٽي چيو ته هو هر سينٽرل جيل ۾ نشي جي عادي ماڻهن جي بحالي جو يونٽ قائم ڪرڻ چاهي ٿو.
سنڌ جي جيل کاتي بابت صلاحڪار اعجاز جکراڻي چيو ته جيلن ۾ نشي جي عادي ماڻهن جو علاج ڪرايو ويندو آهي.
آءِ جي سنڌ غلام نبي ميمڻ چيو ته شهرن ۾ منشيات مافيا خلاف مسلسل آپريشن جاري آهي، سپلاءِ لائن کي ڪنهن حد تائين ڪنٽرول ڪيو ويو آهي.
